Bazoqhubeka nomcimbi wesitshudeni esibulewe
ABANGANI besitshudeni saseTshwane University of Technology (TUT), esishiswe ngoMashi 1 sisemotweni esisebenza ngayo emasontweni amabili adlule, bazoqhubeka nomcimbi ebesiwuhlelela inyanga ezayo.
Uyaqhubeka ezinkundleni zokuxhumana umkhankaso wokukhuthaza ukuboshwa kwababulali bakaMnuz Siyabonga Langelihle Ngcobo (21) waseMatikwe eNanda, obengumshayeli weTaxify eTshwane. Abangani nezihlobo basungule umkhankaso obizwa nge#JusticeForSiyabonga kuTwitter lapho beqonde ukufaka ingcindezi ekutheni kuboshwe ababulali. NgoLwesihlanu izitshudeni zaseTUT nomphakathi zibe nemashi nenkonzo yokumkhumbula.
Esitatimendeni esithunyelelwe Isolezwe kuvela ukuthi uNgcobo ubenza unyaka wesine ezifundweni zeSports Management eTUT. Ubenenkampani yezokungcebeleka ayisungule nyakenye ebihlela imicimbi enyuvesi. Ushona nje ubelungiselela umcimbi wePicnic obuzoba sesikhungweni ngenyanga ezayo. Kuthiwa uqale ngoFebhuwari 23 ukushayela amatekisi eTaxify ngenhloso yokuqoqa imali yokwenza umcimbi wenyanga ezayo. Abangani bakhe sebezibophezele ukuthi bazoqhubeka nokuhlela umcimbi ngenhloso yokukhumbula umufi nokufeza iphupho lakhe.
Okhulumela umndeni, uNksz Buhle Mbonambi, utshele Isolezwe izolo ukuthi bonke bayabuya beza eThekwini bazolungiselela umngcwabo olungakaziwa usuku lwawo. Uthe wonke amaphupho kamufi abeseqala ukufezeka ngoba ubekhonze ukuzithuthukisa.
“Umphumela wokuhlola isidumbu uphumile ngoLwesine, yima sizohlala phansi nomndeni sihlele umngcwabo kodwa kungenzeka kube yimpelasonto. Kukhona uphenyo olulandelwa amaphoyisa ngokushona kwakhe kodwa asikwazi ukudalula eminye imininingwane ngalo,” kusho yena.
NgoLwesihlanu umndeni kaNgcobo uvakashelwe yithimba elithunywe ngungqongqoshe wezokuthutha kuzwelonke ukuyobhonga emswanini eTshwane. NgoLwesithathu kuzoba nenkonzo yokukhumbula umufi ehholo lomphakathi eNgoqokazi, eNanda ngo-4 ntambama.