Kuvezwe ukuxhashazwa kwezimali kowezempilo
IKOMITI lezempilo esiShayamthetho KwaZulu-Natal litshelwe ngokungaphathwa kahle kwezimali eMnyangweni wezeMpilo esifundazweni. Phakathi kwezinto ezitholwe yikomiti kubalwa ukungaphathwa kahle kwemali eyabelwe imitholampilo engomahamba-nendlwana, ngokunjalo nokusetshenziswa kukaR52.5 million kuqashwa ibhasi.
Ngokwesitatimende esithunyelwe uSihlalo wekomiti, uMnuz Yusuf Bhamjee, ezinye zezinto ezitholwe yikomiti, kwaqala ukubikwa ngazo ezindabeni eminyakeni emithathu edlule, ziyingxenye yophenyo olwenziwa uMvikeli Womphakathi u-Adv Busisiwe Mkhwebane.
“Emhlanganweni esibe nawo ngoLwesihlanu sidingida ezempilo, ikomiti lithole ngokuxhashazwa kwemali yabakhokhi bentela eMnyangweni wezeMpilo eKZN. Lokhu kuvele ngesikhathi sinomhlangano ojwayelekile wokuthi sibheke ukusebenza kweminyango kahulumeni. Kulokhu besibheka ukusebenza koMnyango wezeMpilo,” kusho uBhamjee esitatimendeni.
Kulesi sitatimende uveze ukuthi kwachithwa imali engaphezulu kuka R50 million kuthengwa amabhasi angu-95, lilinye ligibelisa abantu abangu-23.
“Umnyango waqhubeka waqasha ibhasi elilodwa ngoR1 million ngenyanga, izinyanga eziwu-36, okwagcina kubalelwa kuR52 million. Inkontileka eyasayiniswa umnyango yaphela ngo-2016 kodwa umnyango wayelula isuka ku-Ephreli 2016 yaya kuJulayi 2016.
Ukuqashwa kwebhasi yikona okushiye ikomiti lithukile, kwazise ngo-2015 iSouth African Press Association (Sapa) yabika ukuthi uMnyango wezeMpilo kulesi sifundazwe wanikeza izinkampani ezimbili, iMzansi Lifecare neMobile Satellite Technologies, ithenda kaR61 million.
IMzansi Lifecare yanikezwa ithenda kaR52.5 million ukuthi iqashe imoto enkulu enomshini weX-ray ne-ultrasound emnyakeni emithathu. Le nkampani yasungulwa ezinsukwini eziwu-17 ngaphambi kokuthi kufakwe isikhangiso sethenda emaphephandabeni kahulumeni ngo-2012.
Owayeyinhloko yezempilo KwaZulu-Natal, uDkt Sibongile Zungu wasayina le thenda ngo-Agasti ngo-2013, evuma ukuthi umnyango ukhokhele iMzansi Lifecare uR1.5 million ukuthi iqashe le moto eyayingenabo abasebenzi.
Ngesikhathi lokhu kuvela ezindabeni ngo-2015, kwavela ukuthi umnyango wawungaphumelela ukuthenga amabhasi amane e-United States ngemali eyachithwa kuqashwa elilodwa ngethenda.