Bagezeke igilo ngezingoma zaMageza Amahle

BAPHUME begezeke igilo abalandeli beqembu Amageza Amahle, ezindlini zomsakazo Ukhozi FM, kwaSABC M1 Studio, ngoMgqibelo njengoba belizolalelisa abalandeli balo izingoma ezizozwakala kwialbhamu yalo entsha ezophuma maduze.

Leli qembu lishaye imicu embalwa ethokozelwe abaningi abebeze kulo mcimbi.

Umcimbi ubusakazwa bukhoma ohlelweni lukamaskandi olwethulwa uBheka “BK” Mchunu noNkosinathi Mshengu, uSgiya Ngengoma.

Umholi weqembu uPotso Ngobese uthe, usuku luhambe ngendlela abebeyilindele.

“Kuza umcimbi omkhulu Indidane Maskandi Festival ozoba sekuqaleni kuka-Ephreli, enkundleni yezemidlalo yasePomeroy la siyobe sihlonipha khona leli qhawe. Sibone kungcono ukuthi size kubalandeli bethu sizobazwisa izingoma abazozithola kwi-albhamu futhi sibanxuse ukuthi abeze kulo mcimbi wokuhlonipha iqhawe labo Indidane,” kusho uPontso.

Uthe indlela abajabule ngayo bebona kutheleka abalandeli babo ngamatekisi ayichazeki.

“Siyabonga ngothando abalandeli bethu abalokhu besikhombisa lona,” kuchaza yena.

Abalandeli baleli qembu bebephume ngobuningi njengoba kuze kwaphoqa ukuthi onogada kulo msakazo bavale amasango abanye basala ngaphandle.

Ngisho ngaphakathi lapho obekunomcimbi khona bekuvalwe ngomuntu emnyango.

Kucacele ngisho izingane ukuthi abalandeli bayazifela ngezingoma ezintsha njengoba bebesukuma besina bekhombisa ukuzijabulela.

Kulo mcimbi leli qembu belidlala bukhoma.

Kuzokhumbuleka ukuthi Amageza kube yiqembu lokuqala ukuthatha isicoco emcimbini weSolezwe, Ingqwele kaMaskandi ngonyaka odlule.