ISharks ihambe inokuzethemba
NGEMUVA kwemidlalo emibili iCell C Sharks ingafinyeleli egiyeni ebifuna ukuqala ngalo isizini entsha yeVodacom Super Rugby, kufanele ukuba umphumela ewuthole inenebula iSunwolves ngo 50-22 uyenze yafulathela leli inokukhulu ukuzethemba.
ISharks iqale ngenduku eyithole kwi-Emirates Lions yalandela ngeWaratahs lapho idlale khona ngokulingana singekho isidingo. Lo mphumela ewuthole kwiSunwolves ngoMgqibelo eJonnson Kings Park, kufanele uyenze izizwe ukuthi seyiwuqalile umqhudelwano walo nyaka.
Isilomo seSharks sakudala, uButch James sithe iSharks isethubeni lokubuya nemiphumela emihle ekuhambeni ngoba ibophele abaningi abanekhono eliseqophelweni eliphezulu.
“Okumnandi ngeSharks kulokhu wukuthi ikhono liningi. Abadlali abafana noLukhanyo (Am), Makazole (Mapimpi) noBeast Mtawarira obeqopha irekhodi elisha lokudlala imidlalo eminingi kunabo bonke abake bagqoka ijezi loShaka kwiSuper Rugby, kuningi abazolenzela khona. Ngizwa nginethemba. Kuningi okuhle engikubonile ngisho kule midlalo yokuqala emibili okungavelanga kuyona imiphumela emihle,” kusho uJames. Kuningi okuhle okubonakele kulo mdlalo kwazise bekungowokugcina ngaphambi kokuthi leli qembu likaRobert du Preez lifulathele leli libhekise amabombo e-Australia naseNew Zealand. Imidlalo yeSharks ekuhambeni iqala ngoweBrumbies ngoMashi, Rebels (23), Blues v Sharks (31) owokugcina kube oweHurricanes eWellington, ekuqaleni kuka-Ephreli.
Okufanele ukuba kumjabulise kakhulu uDu Preez ukuthi iSharks inqoba nje vele bekuyiyona ebithwelwe ngeqoma. Nendlela enqobe ngayo imkhombisile ukuthi angaya phesheya inethemba lokubuya nemiphumela encomekayo. Kulo mdlalo iSharks ishaye ama-try ayisikhombisa kwamane. Ziye ekhefini iSharks ihamba phambili ngo 24-3.
Isiyonke imiphumela yeVodacom Super Rugby ihambe kanje:
Jaguares 38-28 Waratahs; Lions 35-38 Blues; Sharks 50-22 Sunwolves; Reds 20-14 Bulls; Hurricanes 29-19 Rebels 33-10 Brumbies; Highlanders 33-15 Stormers.