UKomphela akakagculiseki
NAKUBA kubukeka sengathi isikhathi sesidliwe yinja kodwa uSteve Komphela akakagculiseki ngendlela iqembu lakhe iKaizer Chiefs, elidlala ngayo.
Lena yisizini yokugcina enkontilekeni yeminyaka emithathu eyasayinwa uKomphela kuMakhosi.
UKomphela uveze ukuthi awakaqini amabhawodi ngendlela iChiefs edlala ngayo ngemuva kokubekisa indawo kumaquarterfinal eNedbank Cup ngempelasonto. Amaqembu ayisishiyagalombili asele azoqhathwa ngoLwesine. IChiefs ishaye iqembu elidlala kwiNational First Division (NFD), iStellenbosch FC ngo 2-1 emdlalweni obuseMoses Mabhida Stadium ngoMgqibelo ebusuku.
“Siyajabula ukuthi lo mdlalo sesiwuqedile. Kuwumsebenzi wethu ukuthi sidlulele kumasemi final nokowamanqamu, sifike siwine nakhona uma iNkosi ivuma. Kodwa ngeke ngizixukuze umqondo, ngizifake ingcindezi ngokucabanga ukuthi kuzokwenzakani ngomuso.
“Uma usuwazi ngokuzokwenzeka kusasa sisuke sikuphi isikhathi sokuzikhathaza futhi noma ungazi asikho ngoba kungenzeka ubhekane nenselelo ehlukile. Ngakho okwamanje sizojabulela lokhu kuwina. Silindele ukuqhathwa kwamaqembu ngoLwesine bese sibhekana nomdlalo ngamunye. Sizobe sesigxila kowaMaZulu,” kusho uKomphela.
Umdlalo olandelayo weChiefs owe-Absa Premiership lapho bezovakashelwa Usuthu eFNB Stadium ngoMgqibelo ngo-6 ntambama.
Amagoli eChiefs ashaywe nguEric Mathoho noLeonard Castro.
UCastro oshaye igoli lakhe lesithathu kusukela efike kuMakhosi ngoJanuwari, ubeyibambe noBernard Parker phambili.
EleStellenbosch libekwe phakathi ngu-Allan Robertson, lidla u-Itumeleng Khune ekhoneni.
“Ngicabanga ukuthi basebenzisane kahle (uCastro noParker). Igoli lesibili, ibhola liqale kuParker ngaphambi kokuthi alifakele uCastro. Indlela ababambisene ngayo ngicabanga ukuthi singakhela kuyona. Yikhona okuhle engikuthatha kulo mdlalo engizokubheka. Lo mphumela ubuyisa ukuzethemba njengoba besingakaze sihlulwe ngaphambi kokushaywa (yiPirates) ngesonto eledlule. Ukuba kwiChiefs kusho ukuvuka uzithathe ngaphandle kokuzifakela ingcindezi ngokwakho ngoba ihlezi ikhona. Okuhle esikwenze kulo mdlalo sizokubheka kanjalo nokungalungile esisalokhu siqhubekile nokukwenza,” kusho uKomphela.
Ukungena kwegoli leStellenbosch ngezinye zezinto uKomphela abalule ukungenani ngazo.
“UMason Smith ungenile wasinika inkinga ngamabhola abegotshwa. Ukungenelwa yilolu hlobo lwegoli nakho akungijabulisi. Lingene ekhoneni okuyinto obekungamele yenzeke. Kodwa ke ekugcineni sineme ngokuthi sikutholile lokhu ebesikuzele, okuwukuqhubekela emzuliswaneni olandelayo,” kusho uKomphela. Ngesizini edlule iChiefs ikhishwe yiSuperSport United kuma-quarterfinal eNedbank. Lo mqhudelwano yiwona obonakala usiyithuba lokugcina kuKomphela ukunikeza abalandeli beChiefs into abayohlale bemkhumbula ngayo. Kwiligi Amakhosi akweyesihlanu kwi-log ngemuva ngamaphuzu ayisishiyagalombili kwiMamelodi Sundowns ezihola ngawu-43.