UKriel ufuna ukuhamba ezinyathelweni zikaBudler
UMPETHA weWBC International minimum weight, uDeejay Kriel, ufuna ukuhamba ezinyathelweni zikaHekkie “Hexecutioner” Budler, omunye wabashayisibhakela abaqophe umlando esibhakeleni somhlaba.
UKriel (14-1-1) uvikele ngempumelelo ibhande lakhe kuXolisa Magusha wase-Eastern Cape empini ebikade ise-Emperors Palace, eGauteng, ngempelasonto edlule. Impi ibikade iyimpinda emuva kokuba uMagusha, ongumpetha we-SA minimumweight, ekhale ngaphansi kuKriel nyakenye.
UKriel ukleliswe endaweni ka-12 yinhlangano i-WBC kwabagaqele ibhande lomhlaba eliphethwe nguWanheng Menayothin waseThailand. Usesitebeleni esisodwa noBudler eHotbox Gym kaColin Nathan esishaya nangompetha we-International Boxing Organisation (IBO), uSimpiwe “Chain Reaction” Konco. UBudler ubekade ephethe ibhande le-IBO nele-World Boxing Association (WBA) minimumweight agcine ewaphucwe nguByron Rojas waseNicaragua ngo-2016.
“Akasekho umshayisibhakela eMzansi engisafuna ukubhekana naye. Sengifuna ukugxila phesheya kwezilwandle ezimpini zomhlaba ukuze lizokwaziwa igama lami. Ngifuna ukuhamba ezinyathelweni zikaHekkie omunye wabashayisibhakela engibukela kubona,” kusho uKriel.
UKriel ugxekwa yiningi ngokungabi naso isibhakela sokuqeda ngembangi noma sekucaca ukuthi isiphelelwe wushatini. Ezimpini zakhe eziningi ushaya isibhakela kodwa ayinike intuba yokuphefumula imbangi. UKriel uqale isibhakela ngo2014. Ungomunye wabashayisibhakela abangazilambeli izimpi eMzansi. Nyakenye ulwe izimpi ezintathu.
Ngo-2016 walwa ezine okuyisibalo esifanayo nesango-2015. Ukusebenzisana kukaNathan neGolden Gloves kubukeka kuyikhona okuhlomulisa uKriel kwazise iningi labashayisibhakela abangekho ngaphansi kwalesi sitebele babulawa yindlala yezimpi.
“Into engingenayo engizama ukuyakha wukuxina ibhokisa engisuke ngibhekene nalo, ngishaye izibhakela eziningi. Ngiyakholwa wukuthi uma ngingenza lokho ngingaziwina ngomngqimuzo womlalisa phansi izimpi. Kodwa-ke siyasebenza, siyafunda, iyona indlela okufundwa ngayo,” kusho uKriel.