Uphika ukuphela kwenkinga ngoZuma
UMREPHA osuse umsindo ngengoma ebigqugquzela ukuba kukhishwe uMnuz Jacob Zuma esikhundleni sobumengameli, uSizwe Mpofu-Walsh, uthi umzabalazo usaqhubeka.
USizwe, oyindodana yomholi we-EFF u-Advocate Dali Mpofu, ubephawula engxoxweni ekhethekile neSolezwe ngemuva komcimbi wokwethulwa kwe-21st Time of the Writer International Festival, eDurban Art Gallery izolo.
Uthe ukuphuma kukaZuma kwakungasho ukuthi sekuphelile ngezinkinga ezikhungethe leli. “Ngajabula khona ngoba kwakusho ukuphunguka kwezinkinga. Ziningi izinkinga okusadingeka zixazululwe njengeyeKhabhinethi. KunoNgqongqoshe okufanele baxoshwe abanjengo (Nkk) Bathabile Dlamini, uMalusi Gigaba nabanye. Nendaba yokubuyiselwa komhlaba kubantu siyibhekile,” kusho lo mrepha weCD egabe ngengoma ethi Mr President nencwadi esihloko sithi Democracy and Delusion. Eqhubeka uthe nakuba uyise eyilungu le-EFF kodwa yena akahlanganise lutho nayo. “Zikhona izinto engivumelana nazo aziphakamisayo nezinye engiphikisanayo nazo. Engikushoyo akuhlangene naye.”
Ukuba yisishoshovu kwakhe emzabalazweni uthe ukuqale esafunda ngoba wayevamise ukulwela amalungelo abafundi. Uthe umculo wakhe awudlalwa kakhulu eziteshini zakuleli ngenxa yokuthi uyapolitika. “Isiteshi esingidlala kakhulu Umhlobo Wenene neY FM. Ngisazokulwela lokho ukuze ugcine sewudlalwa yizo zonke.”
Ukunqena kwentsha yakuleli ukufunda yikho okwamenza wangena emculweni we-rap.
“Ngiqale ukurepha ngisafunda no-AKA esikoleni saseGoli iSt John’s College. Ngabuye ngayofunda e-England, lapho ngabona khona ukuthi kufanele ngisebenzise ulimi oluqondwa yintsha uma ngifuna ukukhuluma nayo okuwumculo i-hip hop.
Kulesi sithangami sabezindaba seTime of the Writer International Festival bekukhona ababhali bamazwe ngamazwe.