Kusolwa umbango kubulawa induna
KUSOLWA umbango wesikhundla sobuduna ngokubulawa kwenduna yaKwaMaphumulo edutshulwe phambi kwabagibeli isetekisini eya KwaDukuza ngoMgqibelo.
UMnuz Sihlangusakhe Shangase, obeyinduna eMhlambandlovu, KwaMaphumulo, kuthiwa udutshulwe womunye umgibeli obesetekisini eyodwa naye obesecele ukwehla.
Indoda ebihleli esihlalweni esingemuva kuthiwa icele ukwehla ngaphambi kokuthi itekisi ingene edolobheni KwaDukuza. Umshayeli ube esemisa itekisi ngaphambi kokuthi basukume abanye abagibeli ukuze indoda yehle.
Kuthiwa ithe isizophuma etekisini indoda yadonsa isibhamu enqulwini yadubula uShangase obehleli esihlalweni esingemuva komshayeli maqede yabaleka yangena emotweni ebime eduze kwetekisi. UShangase ufele khona lapho.
Umthombo osondelene nomufi uthe kusolwa umbango wesikhundla sobuduna.
Uthe umbango ubangwa wukuthi izinduna seziyahola. Ogaqele isikhundla sikamufi ubefuna imali eholwa ngumufi. Bekunokukhononda ngokuthi umufi unemali ngakho akayidingi imali yobuduna ayiholayo.
Umthombo uthe bese kungokwesibili umufi ehlaselwa kule nyanga.
Umfowabo kamufi, uMnuz Simosakhe Shangase, uthe uyasola ukuthi ababulele umfowabo baxhumene nokudutshulwa kwakhe okokuqala.
“Kusho ukuthi bebemfuna efile umfowethu. Bebazi ukuthi wababona kodwa wathi akabazi. Angiboni ukuthi bebengamlandelela ukube wayekade ebabonile ekubeni bengazange bathathe lutho lwakhe ngesikhathi bemdubula okokuqala,” kusho uShangase. Umufi, obebhace eThekwini, kuthiwa ubeyolungisa izinto ezithinta umasingcwabisane wakhe ebhange KwaDukuza. “Ngokubona kwami kusho ukuthi abahlaseli bebehlala bemelusile umfowethu. Thina sizitshela ukuthi ubhacile nje kanti uyaziwa lapho ehleli khona. NgoMgqibelo washiya imoto wahamba ngetekisi ngoba ezitshela ukuthi abafuna ukumbulala bambona kalula uma ehamba ngayo. Uthe akanalo ulwazi lokuthi yini imbangela yokubulawa kwakhe kodwa ubesanda kuthatha umhlalaphansi eKent Motors and Panel Beaters, eThekwini, futhi eyinduna,” kusho uShangase.
Okhulumela amaphoyisa kulesi sifundazwe, uCol Thembeka Mbele, uthe umgibeli obesetekisini ebelisuka eThekwini liya eStanger udutshulwe wabulawa esetekisini. Imbangela yokubulawa kwakhe ayaziwa. Amaphoyisa aphenya icala lokubulala.