Isexwayiso kwabathinteka ekucwaseni ezikoleni eKZN
USEKHIPHE isexwayiso kwabathinteka ezigamekweni zokucwasa ngokobuhlanga ezikoleni uNgqongqoshe wezeMfundo KwaZulu-Natal emuva kokwanda kwalezi zigameko.
UMnuz Mthandeni Dlungwane uthe ukhathazekile ngokwanda kokucwasa ezikoleni athe ngeke bayekwe abathinteka kukona. Ukusho lokhu nje ngesonto eledlule kuphazamiseke ukufunda izinsuku ezimbili eParkhill Secondary eThekwini, abafundi bekhala ngothisha okuthiwa ucwasa abafundi abamnyama. NgoMsombuluko odlule abafundi badube amakilasi bangabuyela nangoLwesibili bekhala ngokuthi uthishanhloko akazithathi izinyathelo ngothisha osolwayo.
Omunye umzali okhulume neSolezwe kodwa wacela kugodlwe igama lakhe uthe izingane bezibabikela ngokucwaswa ngokwebala yilo thisha kodwa kungekho okwenziwayo. Isolezwe lithole ukuthi uthisha wesifazane osolwayo umiswe amasonto ayisihlanu esikoleni njengoba esaphenywa uMnyango wezeMfundo.
Okhulumela umnyango, uMnuz Kwazi Mthethwa, uthe abakwazi ukukhipha imininingwane ngokumiswa kukathisha ngoba kungaphazamisa uphenyo. Ukugcizelele ukuthi banohlu lwezikole ezisolwa ngokucwasa.
“Udaba lokucwasa ezikoleni asiluthathi kancane yingakho sithatha izinyathelo. Uma kudingeka ukuthi kube khona omiswayo noma oxoshwayo, siyakwenza lokho. Sazisa abathintekayo kuphela ngezinqumo ezithathwa wumnyango uma sekuphenywe kahle nasesikoleni,’’ kuchaza yena.
Mayelana neParkhill Secondary ukuqinisekisile ukuthi umnyango ungenelele emuva kokubikelwa udaba lokucwasa. Uthe ukufunda kubuyele esimeni izolo.
Esitatimendeni esithunyelelwe Isolezwe, uDlungwane uthe isifundazwe sihlaselwe yisihlava sokucwasa ngokobuhlanga, esithinta izikole ezizimele nezikahulumeni. “Sinxusa othisha nabafundi bakuqonde ukuthi ukucwasa akuvumelekile ezikoleni kodwa kuyihlazo ukuthi kunezikole ezisakwenza. Sixwayisa izikole ukuthi zilwe nokucwasa, zithathe izinyathelo ezinqala ngakho. Uma kukhona otholakala ecwasa uyothathelwa izinyathelo ngokushesha. Uma isikole sesithole ukuthi kukhona ocwasayo kodwa angathathelwa zinyathelo, kusho ukuthi naso siyahambisana nalesi sihlava,” kusho uDlungwane.
Unxuse ukuthi izikole zikhumbuzane ngemigomo nendlela yokuziphatha ukugwema ukucwasa kwanoma iyiphi indlela. Uthe nabazali kumele bazi ngokucwasa ukuze bangenelele uma kukhona isikole esingahambisi ngokoMthethosisekelo wezwe.