Babuyela enkantolo abasolwa ngokubulala iphoyisa
BAZOBUYELA namhlanje enkantolo abasolwa abathathu ababhekene necala lokubulala uConstable Senzeni Msipha (33) owaduka ngoJanuwari 31 esuka kubo eGingindlovu.
Abasolwa ababili okukhona kubo nesoka lakhe, oMnuz Lucky Masinga (32) noThandanani Zikhali (37) baboshwa ekuqaleni kukaFebhuwari.
Umsolwa wesithathu okusolakala ukuthi uyinkabi, uboshwe ngoMgqibelo eMhlali. Kutholwe ukuthi uyathinteka ekubulaweni kukaConstable Msipha. Lo msolwa uvele enkantolo yaseNyoni izolo. Kulindeleke ukuthi abuyele enkantolo namhlanje noMasinga noZikhali ukuze baqhubeke nesicelo sabo sebheyili.
Okwamanje amaphoyisa alindele imiphumela yolibofuzo ezoqinisekisa ukuthi isidumbu esatholwa emotweni kaConstable Msipha ngesakhe ngempela yini. Njengoba ingakaphumi imiphumela yolibofuze, leli phoyisa alikafihlwa.
UConstable Msipha ubesebenza esiteshini samaphoyisa eMthunzini.
Umndeni wakhe wabika ukuthi udukile ngoJanuwari 31, emuva kokuthi ehambe ekhaya eMaqhakaza, eGingindlovu, ethi uya enxanxatheleni yezitolo iGingindlovu Mall.
Umndeni wakhe wakhathazeka ubona kushona ilanga engabuyi wase ubika emaphoyiseni.
UNgqongqoshe wamaPhoyisa kuleli, uMnuz Bheki Cele, uthe ngeke bakubekezelele ukubulawa kwamaphoyisa futhi uzocela izinkantolo ukuthi zigwebe izigebengu eziwabulalayo odilikajele.
Udonse ngendlebe amaphoyisa ukuthi angafi nezibhamu zawo kodwa aziphindiselele ezigebengwini eziwahlaselayo.
Uthe uzokwenza konke okusemandleni ukuvikela amaphoyisa ekubulaweni yizigebengu ukuze wona agcine abantu baseNingizimu Afrika bephephile.