Yihlazo ukungagcini izethembiso ebholeni kwabaphathi
UKUNGAZIGCINI izethembiso ezithinta imali kwamaqembu ebhola aseNingizimu Afrika kuwafaka ehlazweni elikhulu njengoba kwenzekile kule mpelasonto abadlali beBloemfontein Celtic beteleka.
Odabeni oluphume kulona leli phephandaba abadlali bePhunya Selesele baqome ukungayi ejimini ngoMgqibelo ngoba bekhala ngokuthi imali abayethenjiswa ngesikhathi besayina izinkontileka ayikakafiki ezandleni zabo. Le mali akufanele kuze kuphele izinyanga umdlali esayinile kodwa ingakafiki kuyena ngoba ihambisana nokusayina isivumelwano sokuzibophezela eqenjini.
Nokho amaqembu amaningi aseNingizimu Afrika anawo umkhuba wokuziba ekukhokheni le mali. Kwesinye isikhathi kuze kushaye nesikhathi sokuthi umdlali afune ukushiya eqenjini, uthole ukuthi le mali akayikhokhelwe, okuyinto evamise ukususa umsindo omkhulu.
Okuphawulekayo ngeCeltic wukuthi akuqali ukuba nesiphithiphithi kuyona. Abadlali baleli qembu bake bakhala ngokuthi bakhathele ngoba bekhononda ngokujima nangezimpelasonto. Izikhulu zeCeltic kufanele zibonge ngoba umdlalo wangempelasonto bebebhekene neRichards Bay FC koweNedbank Cup Last 16 bawuwinile. Nakwi-Absa Premiership akukubi kangakho njengoba iPhunya Selelesele ilele endaweni yesishiyagalolunye kwilog. Nokho indaba yokungazigcini izethembiso kwabaphathi bamaqembu ebhola aseNingizimu Afrika iyihlazo kakhulu.
Kungani ngempela kudingeka abadlali baze bateleke ukuze bathole imali abasuke bethenjiswe yona ngesikhathi besayina? Uma kunesimo esithile esithinta imali abaphathi bamaqembu kumele bahlale phansi nabadlali babachazele kungaze kube nokungaboni ngaso linye, okuholela ekutheni abadlali bahudule izinyawo.
Abadlali banomgomo wokumela amaqembu abo ngokuzimisela futhi isikhathi esiningi kusolwa bona nomqeqeshi uma izinto zingahambi kahle. Kodwa nabaphathi akumele bavumele isimo lapho abadlali beze badube khona iqembu ngoba bekhala ngezimfuno zabo. Into ebuhlungu wukuthi le nto igcina icekele phansi iqembu ngesinye isikhathi uma selingasayitholi imiphumela emihle ngenxa yokuthi abadlali basuke becasukile. Abaphathi abazihloniphe, baqikelele ukuthi isithunzi samaqembu abo asidicileleki phansi.