UMalema akayeke ukukhuluma sengathi kukhona akwaziyo ngempi
MHLELI: Ngizizwa ngikhathazeka ngenkulumo elumelayo kaMnuz Julius Malema eyibhekise koNgangezwe Lakhe. Ngikhathazwa yinkulumo kaMalema lapho ethi khona yena akesabi muntu, wesaba uNkulunkulu kuphela. Ukube uMalema uyamazi uNkulunkulu, ubengeke adelele uBayede nesizwe sonkana samaZulu njengoba enza .
Ngiyamangala ukuthi yini lena eyenza uMalema aze agamanxe kangaka phezu kweSilo ngoba iSilo kakukho nokukodwa ebesikushilo kuye. Isilo kasikhulumanga ngomthetho nesivumelwano sabo abebesivotela ePhalamende esikhuluma ngokuthathwa komhlaba ngaphandle kwesinxephezelo kodwa sikhulume ngomhlaba ongaphansi kweNgonyama Trust. Besikhuza i-ANC ngesiphakamiso sayo engqungqutheleni yokuqeda noma yokuchitshiyelwa kweNgonyama Trust. Kukho konke loko abazange behlale nezinhlaka ezifanele njengayo uqobo Ingonyama, uNdunankulu wesizwe, amakhosi, izinduna nesizwe sonkana .
Ukube uMalema ubenenhlonipho futhi azi ngentando yabantu ubezoqala kulezi zinhlaka esengizibalile ezwe umbono wazo kuqala ngaphambi kokuya kwabezindaba ayosho amazwi aziswana okuthi yena akesabi muntu.
Wazini ngempi uMalema? Wake walwa yiphi? Pho ufundisa bani ongazi ngokuthi impi iyabulala. Ukugxambukela kwakhe exuba izinto ezimbili kuyangethusa.
Bengimhlonipha ngithi usekhulile kepha le nkulumo yakhe ingenza ngizibuze ukuthi ngabe akekho ongazi ukuthi yabambana ngezihluthu phakathi kwabamhlophe nabamnyama kuvikelwa umhlaba wokhokho.
Zihloniphe mfo kaMalema. Nkabiyahlaba Ndengezi EGEORGE GOCH