Kuwashubele amaqembu asemsileni
Park igawulwe yizembe iqeda emsileni ngamaphuzu angu-27. Ngaphezu kwayo bekukhona iBaroka FC, ngawu-28, edlale kumaPlay Off.
Ngo-2015/2016 iJomo Cosmos iye kwalasha ngawu-25, yalandelwa yi-University of Pretoria ngalingangayo. Ngo-2014/2015 AmaZulu ashoveleke ehlathini eqeda enawu-27, iMoroka Swallows yayodlala kuma-Play Off ngawu-30, yafika yabisha.
Sekusele imidlalo eyisikhombisa kwi-Absa Premiership kodwa kunamaqembu amahlanu abambane ngamaphuzu awu-27.
Kuwona kubonakala sengathi indawo ayibalekelayo sekungeka-15 njengoba iPlatinum Stars ivale amabhuleki ngamaphuzu angu-17.
IDikwena ayikanqobi nowodwa umdlalo selokhu kuqale umzuliswano wesibili weligi.
Ngaphezulu kwayo kuhlezi i-Ajax Cape Town (24). Kusukela endaweni yeshumi kwi-log lapho kuhleli khona iLamontville Golden Arrows, akukho ukuphepha. Ilandela iPolokwane City, Chippa United, AmaZulu neSuperSport United. Wonke la maqembu ahlukaniswe amagoli njengoba elingana ngamaphuzu.
Iningi lawo kubukeka kuzowashubela emidlalweni yeligi kule mpelasonto. IPolokwane, esanqobe kanye emidlalweni yeligi kulo nyaka, izovakashela iMaritzburg United eHarry Gwala Stadium ngoLwesihlanu ebusuku. I-United ayizwile kulezi zinsuku njengoba ilwela ukuqinisa indawo yayo kwiTop 8, okwamanje ihleli endaweni yesine.
IChippa izokwamukela iFree State Stars eyikhiphe kwiNedbank Cup ngempelasonto edlule.
AmaZulu FC aya kwiKaizer Chiefs osekuphele iminyaka ewu-11 ehluleka wukuyishaya. Abafana Bes’thende bazoqhuthana ne-Orlando Pirates ePrincess Magogo Stadium ngoMgqibelo ebusuku. I-Pirates izofika emdlalweni izimisele ngokuqinisa indawo yayo yesibili kwi-log. Uma inqoba lapha izozithola isele ngemuva ngephuzu elilodwa kwiMamelodi Sundowns engeke idlale kwiligi njengoba izobe iyibambe koweCAF Champions League.