Usuthu neChiefs esitikini kowePSL

ABHEKENE nomqansa AmaZulu azodudulana neKaizer Chiefs osekuphele iminyaka engu-11 ehluleka wukuyishaya kuyo yonke imiqhudelwano.

NgoMgqibelo ngo-6 ntambama Usuthu luzoshukana naMakhosi emdlalweni we-Absa Premiership e-FNB Stadium, eSoweto, eGoli.

Emzuliswaneni wokuqala la maqembu adlala ngokulingana ngo 0-0 eKing Zwelithini Stadium, eMlaza. NgoMashi 3 ngo-2007, uLucky Mzizi washaya amagoli amabili asiza Usuthu lwanqoba ngo 2-1 emdlalweni weligi.

Kusukela lapho-ke Usuthu alukaze luphinde luhlule iChiefs. La maqembu asedlale imidlalo engu-19 selokhu Usuthu lwagcina ukushaya iChiefs. Kule midlalo iChiefs isinqobe engu-15 yadlala ngokulingana kwemine.

Kule sizini ka-2017/2018 la maqembu asehlangane kabili. Koweligi adlale ngokulingana ngo 1-1 kwathi koweTelkom Knockout, Amakhosi abhudluza Usuthu ngo 3-0 eMoses Mabhida Stadium, eThekwini.

AmaZulu aselahlekelwe wumgqigqo wawo omuhle kwazise akakaze awine emidlalweni emine edlule. NgoLwesihlanu angene ehlazweni ebhuquziswa Ubuntu Cape Town ngo 3-2 emdlalweni weLast 16 yeNedbank Cup. Aguqiswa Ubuntu nje emidlalweni emithathu eyedlule ehlulekile wukunqoba. Athelwe othulini yiMamelodi Sundowns ngo 3-1 ekhaya, adlala ngokulingana ngo 0-0 neFree State Stars.

Ngaphambi kwale midlalo ayekade eshaywe yiMaritzburg United ngo 2-0 eHarry Gwala Stadium, eMgungundlovu.

Njengamanje Usuthu luhlezi endaweni ka-13 kwi-log ye-Absa Premiership ngamaphuzu angu-27 emidlalweni engu-23. Luhlukaniswe amaphuzu amathathu ne-Ajax Cape Town esendaweni yesibili uma usuka ekugcineni.