Libalahlile abakwaGupta lathetha ibhange

LIYITHETHILE iBank of Baroda icala ebelifakwe yizinkampani zakwaGupta ebezifuna leli bhange lihlale ngenkani kuleli.

Izolo iJaji Ntenteya Mavundla linqume ukuthi akukho okubophezela iBank of Baroda ukuthi ihlale eNingizimu Afrika njengoba inelungelo lokuzikhethela ukuthi ihweba kuliphi izwe.

IBank of Baroda yamemezela ukuthi iyagcina ukwamukela amadephozithi ngoMashi 1 futhi ngeke isabolekisa ngemali.

NgoMashi 31 izovala iminyango yayo eNingizimu Afrika ngoba ayisenayo ingqalasizinda yokuqhuba umsebenzi wokubhanga.

IBank of Baroda ibinesivumelwano neNedbank sokuthi isebenzise ingqalasizinda yayo kodwa abaseNedbank basiqedile leso sivumelwano.

Ummeli wezinkampani zakwaGupta, u-Advocate Owen Cook, uthe iBank of Baroda bekufanele isiphikise isinqumo seNedbank kodwa yona ayizange ilwe ngoba vele ibisifuna ukuhamba eNingizimu Afrika.

Uthe ukuphazamiseka kwama-akhawunti ezinkampani zakwaGupta kusho ukuthi abasebenzi abangu-7 000 abaqashwe kuzo bazophazamiseka.

U-Advocate Azar Bham weBank of Baroda, uthe akufanele leli bhange liphoqwe ngenkani ukuthi lihlalele amaGupta eNingizimu Afrika kodwa kufanele liye kwamanye amazwe lapho linamakhasimende amaningi khona.

Ukhale ngokuthi ngesikhathi amanye amabhange evala ama-akhawunti ezinkampani zakwaGupta lo mndeni awenzanga lutho. Kodwa uma iBank of Baroda isihamba bayakhala abakwaGupta.