‘Kufanele sibheke umsebenzi ophambi kwethu’
AKAFUNI babheke izinto ezikude kunabo umdlali wasesiswini we-Orlando Pirates, uThembinkosi Lorch, omunye wabadlali ababhekwe ukuthi bathwale iqembu elisethubeni lokudla isicoco seligi neNedbank Cup.
I-Pirates ngelinye lamaqembu asembangweni wesicoco se-Absa Premiership oholwa yiMamelodi Sundowns. Ikhombisile ukuthi izowushisisa umbango ngesikhathi ihlula iKaizer Chiefs emdlalweni weligi ngo 3-1 emasontweni edlule.
EZimnyama zizobuyela enkundleni uma sezibhekene neCape Town City koweLast 16 yeNedbank Cup eCape Town Stadium kusasa ngo-7.30 ebusuku.
ULorch, obukeka esephenduke ithemba lomqeqeshi uMilutin Sredojevic, uthe nakuba bengakujabulela ukuyiwina yomibili imiqhudelwano esele kodwa akufanele bacabange ngalokho manje.
“Kungakwenyusa kakhulu ukuzethemba kwethu ukuwina iNedbank neligi kodwa kufanele sibhekane nomsebenzi ophambi kwethu ngamunye. Ukuhlula iChiefs kusigqugquzele kakhulu njengoba sizobhekana neCape Town City.”
“Kuzoba wumdlalo onzima kodwa sihlale phansi sacubungula ubuthaka bayo. Sizosebenzisa bona ukuze siwine umdlalo, sidlulele phambili kwiNedbank Cup. Kufanele sisebenzele ukuwina, singabheki okuphambili kakhulu. Umqeqeshi uhlale ekugqugquzela lokho. Konke esikufisayo kuzokwenzeka uma sibhekana nokuwina umdlalo ophambi kwethu ngesikhathi.”
ULorch, oshaye igoli lokuqala koweChiefs, uyiqale kabi isizini ngokulimala. Selokhu ebuyile akasasali esikimini sikaMicho owaziwayo ngokushintsha isikimu sonke isikhathi. Izolo ukuvezile ukuthi uzokwenza izinguquko eqenjini eliqumbe phansi iChiefs ngenxa yokuthi bazoxinwa yimidlalo eduze. Ngempelasonto iPirates izovakashela iLamontville Golden Arrows emdlalweni weligi eThekwini.
“Ngizozenza izinguquko, zingaba yisithupha noma ngaphezulu. Angikazi okwamanje. Ezinye ziphoqekile. Okubalulekile wukuthi siqhubeke nokwenza kahle emuva kokwehlula iChiefs ngoba uma sihluleka kuzoba kungasho lutho konke esikwenzile. Ngilindele ukuthi abazodlala baqhubeke nezinga esesikulona. Kufanele senze izinto ngokucophelela ngoba imidlalo esizoyidlala ilandelana eduzane.”
Nakuba iCity, eqeqeshwa nguBenni McCarthy owayengumgadli wePirates, kucaca ukuthi ingase ibhekane neqembu elihlukile kodwa uLorch akasazimisele ngokudedela abanye esikimini. Olunye ushintsho olubhekwe kakhulu lusezintini kwazise kowabakhaya kade kuvimbe uSiyabonga Mpontshane ekubeni kukade kubhekwe uJackson Mabokgwane.
“Bengingadlali ngesikhathi kuqala isizini ngenxa yokulimala. Kodwa bekufanele ngisebenze kanzima ukuze ngithole indawo esikimini. Umbango wejezi ushubile kwazise lapha eqenjini sinabadlali abasezingeni eliphezulu. Kufanele ngiqhubeke ngisebenze kanzima,” kusho uLorch.
Amaqembu azogijimisana kumaquarterfinal eNedbank Cup ka-2018 azoqhathwa ngoLwesine ebusuku eKapa.