Indoda izolivuma icala lokubulala abashana
ISIVEZE ukuthi izowavuma amacala indoda yasePort Edward esolwa ngokubulala abashana bakhe abane ngoba ifuna ukuthola imali yomshwalense eyayibafake kuwo.
UMnuz Ben Zimele Mbhele (32) uvele eNkantolo eNkulu yaseMgungundlovu izolo, icala lakhe lahlehliselwe uMashi 22, ukuze athole isikhathi esanele sokuxoxa nommeli wakhe.
UMbhele izolo bekulindeleke ukuba avume icala enkantolo bese eyagwetshwa.
Izolo akazange abuzwe ukuthi uyalivuma noma uyaliphika yini icala ebhekene nalo.
Ngesikhathi evela enkantolo izolo ebukeka engumuntu ongathukile kodwa elokhu ejeqeza ngalapho bekuhleli khona abezindaba.
Ugcinwe ezitokisini zaseMountain Rise, eMgungundlovu.
Umbuso izolo uveze ukuthi uMbhele uhlela ukulivuma icala kodwa wathi ufuna ukumnika isikhathi sokuthi atshele yonke into ummeli wakhe abeqala ukuhlangana naye.
UMbhele uboshwe ngoLwesihlanu eNcukeni, ePort Edward, ngemuva kophenyo lwamaphoyisa oluthathe isikhathi eside.
Uvele okokuqala eNkantolo yeMantshi yaseRamsgate ngoMsombuluko. Njengoba icala belihlehliselwe izolo eMgungundlovu bekulindeleke ukuthi avume icala bese enikwa isigwebo.
UMbhele uboshwe nomngani wakhe, uMnuz Sibongiseni Nyawose (43), yena okulindeleke ukuthi avele eNkantolo yeMantshi yaseRamsgate namhlanje.
NgoSepthemba 2, 2017, ngabo 5 ntambama kuthiwa izingane ezintathu, iminyaka yazo ephakathi kwemine no-12, zatholakala endlini zinamanxeba okugwaza emzimbeni, zontathu izindlebe zazo zakwesobunxele esikiwe.
Esinye isidumbu kuthiwa satholakala ngaphandle komuzi naso sinamanxeba okugwazwa.
Kuthiwa izingane zazizodwa ekhaya unina engekho ngesikhathi zihlaselwa.
Kube sekuvulwa amacala amane okubulala esiteshini sasePort Edward nokuholele ekutheni kuboshwe uMbhele nomngani wakhe uNyawose naye okubikwa ukuthi usondelene nomndeni.