Bahoxise isicelo sebheyili ‘ababulala’ eMzimkhulu
BAKUHOXISE ngomzuzu wokugcina ukucela ibheyili ababili abasolwa kwelokubulala umfundisi waseMzimkhulu nomkakhe ngoJanuwari.
OMnuz Andani Monco (30) noKwanele Ndlwana (22) abangamalungu ebandla iMancoba Seven Angels Church batshele inkantolo yemantshi yaseMzimkhulu izolo ukuthi ngeke besayicela ibheyili.
Abasolwa, abakwabayisithupha abasolwa ngokudubula amaphoyisa aseNgcobo ngoFebruwari, bathe basamile ekutheni bazozikhulumela enkantolo abamdingi ummeli.
Izolo bekulindeleke ukuthi bacele ibheyili kodwa kuthe uma sekumele kuqalwe, uMshushisi uNkk Bohang Erasmus wathi ucela ukuthi inkantolo ibabuze abasolwa ukuthi basazoqhubeka yini nokucela ibheyili ngoba umseshi wecala uthe sebeyakuhoxisa ukucela ibheyili.
Imantshi, uMnuz Riazz Essack, yenze njengokusho komshushisi. Bobabili abasolwa bathe sebeyakuhoxisa ukucela ibheyili.
Abasolwa banecala lokubulala uMnuz Ndumiso Jali (72) nomkakhe uNkk NomaIndia Jali (70), abadutshulwa bafa belele emzini wabo. Kulo muzi kwathathwa isamba semali engaziwa.
UJali uke wasebenzisana noMnuz Siphiwo Mancoba ongumsunguli weCrusade Church okwahlubuka kuyo iMancoba Seven Angels Church eyasungulwa ngamadodana akhe ngemuva kokushona kwakhe ngo-2015.
UMancoba washona ngo-2015 ngemuva kokugula. Kuthiwa amadodana akhe ayesola uJali ngokuthi wabulala uyise ngokumfakela ushevu.
Ahlubuka kuleli sonto ayosungula elawo iMancoba Seven Angels Church, eNgcobo. Amanye amalungu ebandla ayesonta kuleli bandla kusekhona uyise enqaba ukuhamba asala kwaJali.
AbakwaMancoba kuthiwa babuyele kaningi kwaJali, bafike bagqekeze bacekele phansi impahla. Phakathi kwezimpahla abazicekela phansi kubalwa netende okwakukhonzelwa kulo abalishisa kubuka umphakathi wakule ndawo. UJali kuthiwa ubengawavuli amacala ngoba ubekholwa wukuthi uNkulunkulu uzomphendulela.
Icala lihlehliselwe uMashi 27 kanti kusalindwe isinqumo somqondisi wabashushisi ukuthi akhiphe isinqumo sokuthi icala lizothethelwa kuphi.