IBlack Sash ifuna iSassa icacise
INHLANGANO esiza umphakathi iBlack Sash ithi ikhathazekile ngokungacaci kwezinhlelo zokuholelwa kwabantu izibonelelo zikahulumeni uma kuwukuthi iNkantolo yezoMthethosisekelo iyanqaba ukulula inkontileka yeSouth African Social Security Agency (Sassa) neCash Paymaster Services (CPS).
Isikhulu sakwaSassa, uNkk Pearl Bengu, sithe abantu abangu 2.8 million basengcupheni yokungazitholi izibonelelo zabo uma inkontileka yabo neCPS ingalulwa ngezinyanga eziyisithupha.
Isizathu salokhu wukuthi eminye imininingwane yabantu abahola izibonelelo zikahulumeni ayikadluliselwa kwaSassa noma eposini.
Esitatimendeni iBlack Sash izwakalise ukungenami kwayo ngeSassa eveze ukuthi ayiyiqoqile yonke imininingwane yabantu abahola izibonelelo zikahulumeni yize yayithembise ukuthi kuzoshaya uFebhuwari 28 yonke into isimi ngomumo.
“Encwadini yeSassa yangoMashi 8 kuvela ukuthi le nhlangano isalinde imininingwane ethile kwaCPS.
Asiqondi ukuthi ithenda yokuthi izinkampani ezifuna ukuholela abantu zibhide kanjani ingatholakalanga yonke imininingwane yabantu abahola izibonelelo zikahulumeni,” kusho iBlack Sash.
Iveze ukuthi izinkampani bekufanele zithumele amabhidi ngoFebhuwari 28 kodwa manje kuthiwe ziwalethe ngoMashi 30.
“ISassa ishintsha isikhathi sokuqoka inkampani entsha ezoholela abantu uma sekuphume iCPS.
Siyakwamukela ukuthi kunomnyakazo ezinhlelweni zokuthi abantu baholelwe yiposi kodwa esinganeme ngakho wukungalandwa kwemininingwane yabantu kwiCPS,” kusho iBlack Sash.
Ithe ifuna kucaciselwe abahola izibonelelo zikahulumeni ukuthi bazohola kanjani ngoEphreli nokuthi kufanele basebenzise maphi amakhadi ngoba imininingwane ekhona ayibacaciseli kahle okuzokwenzeka.
“Siyajabula ukuthi iSassa iyalele iCPS ukuthi inganikezi abantu amanye amakhadi noma ibadayisele eminye imikhiqizo. Kodwa okusiphethe kabi wukuthi iCPS ayikaphenduli ukuthi izowulandela lo myalelo noma cha. Asazi nokuthi kuzokwenzekani uma kuwukuthi inkontileka yeCPS iyaqedwa,” kusho iBlack Sash.