OKlebe bakhala ngokufihlelwa ubufakazi yizikhulu
UPHIKO lwamaHawks lusole izinhloko zeminyango kahulumeni, izimenenja zomasipala nezikhulu eziphezulu zezinkampani zikahulumeni ngokungabiki inkohlakalo futhi nokungathumeli amaphepha uma iqhuba uphenyo lwazo.
Lokhu kuvele izolo ngesikhathi lolu phiko lwethula umbiko walo ekomitini, iStanding Committe on Public Accounts (Scopa).
UMajor-General Alfred Khana, oyiNhloko yokuphenywa kwamacala emali kulolu phiko, utshele iScopa ukuthi izikhulu zikahulumeni ziqoka izinkampani ezizimele ukuthi zenze uphenyo futhi azifuni ukwethula ubufakazi uma kunamacala aqhubekayo.
“Uphenyo olwenziwa yilezi zinkampani aluzi nobufakazi obuphelele ukuze siphenye. Esikhathini esiningi kusuke kuyinkohlakalo eyenzeke emnyangweni othile okusuke kufanele iphenywe ngaphakathi,” kusho uKhana.
Utshele amalungu ephalamende ukuthi abayitholi imininingwane yamacala abasuke bewaphenya ukuze kuboshwe abasolwa.
Uveze ukuthi banamacala angu-30 enkohlakalo athinta uhulumeni kazwelonke. Amacala amathathu uthe asenkantolo kanti angu-26 asaphenywa kulindelwe isinqumo sophiko lwezokushushisa, iNPA, okuyiyona ehambisa amacala enkantolo.
Uthe amacala angu368 enkohlakalo abikwe yizifundazwe, angu-121 asenkantolo, angu-155 ayaphenywa kanti angu-92 alinde isinqumo se-NPA. Emacaleni angu-315 enkohlakalo abikwe womasipala, angu-368 asenkantolo, angu-368 ayaphenywa kanti angu-78 alinde isinqumo seNPA.
Amanye amacala angu-78 enkohlakalo abikwe ezinkampanini zikahulumeni, angu-14 asenkantolo, angu-50 ayaphenywa kanti angu-14 alinde isinqumo seNPA. Amalungu ephalamende abengeneme ngohlu lwamacala, amanye abuze ukuthi kungani kuthatha isikhathi eside ukuwaphenya nokuthi iNPA iwayise enkantolo.
“Besingathanda ukuzwa ukuthi kwenzekani ngamacala athile kodwa awusinikezi imininingwane ecacile. Awusho ukuthi kwenzekani. Siyabonga ngohlu lwakho olude olungasitsheli lutho,” kusho uMnuz Tim Brauteseth weDA.
UKhana uvumile ukuthi umbiko wakhe awunayo imininingwane egcwele wathembisa ukuthi umbiko olandelayo uzofaka imininingwane edingekayo. INhloko esabambile kumaHawks, uLt-General Yolisa Matakata, ibuzwe ukuthi ukuncishiswa kwesabelozimali kuwuphazamisa kanjani umsebenzi wabo.
Ithe inkinga enkulu wukuthi abaphenyi bashiya koKlebe bayosebenzela izinkampani ezizimele.
“Silahlekelwe ngamalungu amaningi eminyakeni edlule. Siyasebenzisana nezinye izinhlaka zezokuphepha ukuze kuqhubeke umsebenzi,” kusho uLt Colonel Matakata.
UKhana uthe imibiko abanikwa yona ngathi ngumbono wabathile akubukeki kuwubufakazi bomuntu ozibonele izigameko.
“Uma sesiphenya siqala phansi yonke into ngoba abantu abanamava banikeza abasebenzi abasebasha ukuthi kube yibona ababhala umbiko. Kwesinye isikhathi yibona ababhala umbiko ukuze siphenye,” kusho uKhana.