Isinqumo sekomiti lePhalamende kolwesomiso
USAMUKELE ngezandla zombili isinqumo sokuthathwa kwesomiso njengenhlekelele ebhekene nezwe uNgqongqoshe wezokuBusa ngokuBambisana neziNdaba zoMdabu KwaZulu-Natal, uNkk Nomusa Dube-Ncube.
Izolo, ikomiti lasePhalamende elibhekela isomiso nokushoda kwamanzi limemezele ukuthi isomiso esihlasele izifundazwe ezihlukene sesizothathwa njengenhlekelele ebhekene nezwe, nokuchaza ukuthi sekuzokwengezwa imali yezinhlelo zokulwa nale nhlekelele.
UNkk Dube-Ncube uthe isinqumo sizosilekelela kakhulu isifundazwe iKwaZulu-Natal njengoba saqala ukubhekana nesomiso ngo-2014.
“Siyasamukela isinqumo njengesifundazwe ngoba siqale ukubhekana nesomiso esibucayi kusukela ngo-2014. Isomiso sesingcono ngenxa yezinhlelo zokonga amanzi esizilandelayo komasipala kodwa izinga lamanzi emadamini lisephansi kakhulu,” kusho uNkk Dube-Ncube.
Uthe balindele ukuthi ukuhlonzwa njengenhlekelele kwesimo sesomiso kuzoqinisa izinhlelo zokonga amanzi ebesezivele ziqaliwe kulesi sifundazwe.
Ezinye izifundazwe ezibhekene nesomiso esinzima yiWestern Cape, yingxenye yeNothern Cape ne-Eastern Cape. Esitatimendeni ikomiti liveze ukuthi njengamanje azikho izimpawu ezikhomba ukuthi imvula izona ngokwanele ukuthi sehle isomiso eWestern Cape naseNothern Cape.
“IWestern Cape yindawo enemvula ngesikhathi sasebusika. Kulindeleke ukuthi imvula ibe khona kusukela ngo-Ephreli. Imizamo yokonga amanzi kulesi sifundazwe nokho isithele izithelo ezinhle muva nje.”
Ngokombiko woMnyango wezaManzi neNhlanzeko ophume ngoMashi 6, izinga lokugcwala kwamanzi emadamini likhuphuke ngo-0.2% uma liqhathaniswa nesonto langaphambilini. Izinga lamanzi emadamini likhuphuke lisuka ku-63.2% laya ku-63.4%.
Njengamanje uphiko olubhekela izinhlekelele, iNational Disaster Management, selusungule ikomiti, iNational Joint Drought Coordinating Committee (NJDCC), elizosebenzisana nohulumeni bezifundazwe ukuze kusungulwe izindlela zokonga amanzi.
Ikomiti liqhube lathi ukuthathwa kwesomiso njengesimo esiyinhlekelele ebhekene nezwe akuyona indlela yokuthola imali nje kuphela kodwa kuzoholela ekutheni kube nokubambisana empini yesomiso ebhekene nezwe.