Uhhahhameziwe umbhali oqhulule izinhlamba
UPHUME esehhahhamezwa yizithameli esteji umbhali wezincwadi wase-Eastern Cape u-Unathi Slasha ngemuva kokushiya angalazi kubagqugquzeli beTime of The Writer International Festival ngesikhathi kuvulwa ngokusemthethweni le festivali, e-Elizabeth Sneddon Theatre e-UKZN Howard College, eThekwini, ngoMsombuluko ebusuku. “Ngiyabonga ukumenywa kula ma .... (esho inhlamba). Angimenywa mina emicimbini ngoba kuthiwa ngikhuluma kakhulu.”
Ube eselandelisa ngoxhaxha lwezinhlamba. Kuthe ngesikhathi esefuna ukufundela izithameli ingxenye yencwadi yakhe esihloko sithi Jah Hills, iningi lavele lamhhahhameza lithi akaphume ngoba usedunge umcimbi. Uqhubekile nokudaza inkani kwaze kwangenelela uMqondisi osabambile we-Centre for Creative Arts (CCA) uNksz Chipo Zhou, engabagqugquzeli bale festiveli, oze wasusa u-Unathi ngesitayela. Umphuce incwadi yakhe wabe esenxusa izithameli ukuba ziyithenge, kwayima lo mbhali ehamba kodwa engeneme.
Ebuzwa u-Unathi ukuthi ubecikwe yini. Uthe yena ugxile ezincwadini ezilandisa ngamasiko nemikhuba yabantu abamnyama base-Afrika kodwa kulawa mafestivali azinakwa lezo zincwadi.
“Kuhlale kukhulunywa ngokuqhakanjiswa kwamasiko abantu abamnyama, okuyinto egcine ingenzekanga. Njalo kuhlale kuhlanganwa kukhulunywana ngento eyodwa kodwa akunazinguquko. Nalapha akukho engizokufunda, ngaphandle kokugxishwa ngamasiko ezinye izinhlanga. Ziphi izincwadi zezinganekwane zabantu abamnyama? Silokhu sifundekelwa ngezincwadi ezikhuluma ngemicabango yabantu,” kubhoka ngolaka u-Unathi.
Isikhulu seCCA, uNksz Siphindile Hlongwa, sithe iTime of the Writer inkundla yababhali abanemicabango esusa inkulumo-mpikiswano.
“Ababhali abaphonsela le festiveli inselelo bamukelekile ukukhuluma nathi nezithameli zethu uma sekudingidwa izihloko ezithile U-Unathi Slasha uzoba yingxenye yethimba elizobe lidingida ngezihloko ngoLwesibili ebusuku (izolo) e-Elizabeth Sneddon Theatre futhi ngoLwesithathu (namuhla) uzobe eseWestville Library,” kuphetha uNksz Hlongwa.
U-Unathi uthe yena ukubhala ngezinganekwane nangemikhuba yabantu abamnyama yikhono alithola kugogo wakhe.