Kubalulekile ukufundisa izingane ukonga imali
KUNENKOLELO yokuthi abamnyama bayahluleka ukonga imali, okwenza lo mkhuba bawuthelele nezingane. Kuthiwa abaningi bacwila ezikweletini ngenxa yokuthi abafundiswanga ukubeka imali beseyizingane. AbakwaDirect Axis bathi lisekhona ithemba ekufundiseni ukonga ezinganeni kodwa kumele kulandelwe izindlela ezithize.
UNkk Marlies Kappers oyinhloko yezokukhangisa kulesi sikhungo esibolekisa ngemali, uthe ingane kumele iwazi umehluko phakathi kwesidingo esibalulekile nokungesona. Uthe ingane kumele ifundiswe ukuthi akuyona yonke into okumele ikhishelwe imali kodwa yilokhu okuyisidingo esibalulekile. Nazi izindlela ongafundisa ngazo izingane ngokuphatha imali:
Ukudlala isitolo (omunye abe ngumdayisi, omunye abe ngumthengi)
Imidlalo edlalwa yizingane iba yisifundo kuzona, ezingakhohlwa yisona ngisho sezindala. Ukukhuthaza umkhuba wokudlala isitolo kungaba yisifundo esihle ezinganeni. Uma zidlala isitolo kumele kube nomuntu omdala ozozifundisa indlela yokuthenga izimpahla ezishibhile. Lokhu kungazifundisa nokuthi zikwazi ukuqhathanisa amanani empahla.
Isikoqokoqo Lena yindlela endala yokufundisa ingane ukubeka imali futhi namanje isasebenza. Ungayibekela imigomo yokuthi ibeke malini ngenyanga, kube nendlela ozoyikhuthaza ngayo. Emalini oyipha ingane makube nengxenye ezongena esikoqokoqweni, ngisho ngabe incane kangakanani. Uma isikoqokoqo sesigcwele, ungayivulela i-akhawunti ebhange noma eposini.
Makukhulunywe ngemali Ukukhuluma nengane nganoma yini kuyasiza ukwakha ubudlelwano phakathi kwayo nomzali. Mayingazitshwa eyokukhuluma ngemali ngoba ingatakula ingane kokuningi.
Yiba yisibonelo Kwesinye isikhathi ingane idinga ukubona umuntu omdala phambi kwayo bese iyamlingisa. Ukuba nesikoqokoqo kungasiza ukukhuthaza nengane. Ningaqhudelana ngokuthi ngesikabani esizogcwala kuqala, kube nomvuzo ekugcineni.