Ukubambisana kuyabasebenzela
AKEKHO umfundi olova kungaziwa ukuthi uloveleni esikoleni eNtsikeni Senior Secondary, esiseNtsikeni, eMzimkhulu, ngoba umfundi ongabikwanga kuthisha wakhe kunamathuba amaningi okuthi abone sekutheleka uthishanhloko kubo.
Lokhu kungenxa yokuthi abafundi, othisha nabazali bakulesi sikole benza izifungo njalo uma kuqala unyaka zokuthi bazobambisana kwezemfundo. Ukufika kukathishanhloko ekhaya lomfundi kusuke kuzokhumbuza umfundi nomzali ngalezi zifungo. Uthishanhloko nothisha bakulesi sikole ezabo izifungo zisuke zithi bazokwenza okungaphezulu kwabaqashelwe kona ukuze kuthuthuke imfundo kulesi sikole. Ukuya ekhaya lomfundi olovayo kuyingxenye yalezo zifungo.
Uthishanhloko, uMnuz Nkululeko Daniel Mpompi, uthe uma efika kubo kamfundi usuke ehamba namalungu esigungu sesikole. Phakathi kwezinto asuke eziphethe wumsebenzi wesikole okumele wenziwe wumfundi omeqile ngesikhathi elovile. Umzali okungenzeka ukuthi naye usuke esekhohliwe yizifungo uthe uyakhunjuzwa ngezifungo zakhe, atshelwe ukuthi njengoba sekuze kwafika uthishanhloko emzini wakhe yingoba yena nengane yakhe bakhohliwe wukubikela isikole ngesizathu esiholele ekutheni umfundi alove.
Kusukela ngo-2013 lesi sikole yisona esihamba phambili esifundeni iHarry Gwala ngokuba nabafundi abaphasa kahle.
Ngo-2016 no-2017 abafundi baphase ngo-100%.
Njalo uma kuqala unyaka uMpompi uthe abafundi bakulesi sikole bayazibophezela ngokuthi bazozihlonipha, bazothembeka, bazohlala beyimbumba futhi bazobhekana nezinkinga eziqhamuka ngenxa yokuziphatha kwabo.
Ukuthembeka kuchaza ukuthi umfundi uma engezwanga ngesikhathi kufundiswa uzokhuluma iqiniso asho ukuthi akezwanga kahle.
Lesi sikole sinabafundi abangu-776, abafundi baka-matric bangu 67. Isikole uthe sakhelwe ukufundisa abafundi abangu-500. Ngenxa yokwanda kwabafundi kuyenzeka kushode amadeski nefenisha. Bonke abafundi bayagunda kulesi sikole.
UMpompi uthe ukuba kunebhasi elithutha abafundi ngabe abafundi abafunda kulesi sikole baningi kakhulu. Uthe kukhona abafike babhalise bagcine bengakwazanga ukuqhubeka nokufunda kulesi sikole ngoba ibhasi elidlula esikoleni libafikisa ngemuva kwesikhathi.
Kulesi sikole kufundwa isiXhosa njengolimi lwebele kanti bonke abafundi abafunda u-matric bahlala eduze nesikole futhi nothisha abafundisa leli banga baqasha eduze.
Lokhu kwenzelwa ukuthi bafike ngesikhathi ngoba esikoleni kungenwa ngo-6.30 ekuseni kuphunywe ngo-4 ntambama. Abafunda u-matric bayahamba bayophumula babuye ngo 6 ebusuku baphume ngo 8.
“Lokhu kwenza ukuthi umfundi abe nesikhathi esanele sokubuza lokhu angakuzwanga kahle. Ngesikhathi abafundi befika bezofunda uGrade 8 siyabacubungula sibone ukuthi umfundi ngamunye yiziphi izifundo azizwa kangcono futhi enza kahle kuzo. Lokhu sikwenzela ukuthi sibafundise ukuthi bangakujabuleli ukuphasa ngamalengiso kube kunabafundi abafeyilile. Sibafundisa ukuthi kuwumsebenzi wethu sonke ukuthi sisize labo esibonayo ukuthi badonsa kanzima ukuze imiphumela yethu ibe mihle.
Uma kunomfundi ofeyilile akuyena kuphela ophendula umbuzo wokuthi ufeyiliswe yini nabanye abafundi kumele baphendule ngokuthi uzakwabo ufeyile kanjani bekhona,” kusho yena.
Lesi sikole siyaziphathela imali yokwenza umsebenzi wesikole, kufundwa mahhala kodwa abazali bayakhuthazwa ukuthi bakhokhe umnikelo ka-R100 njalo ngonyaka ukuze isikole sibhekane nezindleko ezingabhekelelwanga emalini ekhishwa umnyango.
“Imali ekhishwa umnyango inemibandela yokuthi yini okumele iyenze, uma sifuna ukwenza ezinye izinto ezingabaliwe kumele imali ihlanganiswe abazali ukuze singatholi umbiko omubi wokusetshenziswa kwemali. Ngokubonisana nabazali sathatha isinqumo sokuthi uma kukhokhwa imali ngeke kulokhu kucelwa imali abengayihlelele umzali,” kusho uMpompi.
Kulesi sikole kufundwa iSayensi kwiGeneral neCommerce.
Abanazo izinsiza kufunda zeSayensi okuningi abakufundayo bakubheka kwi-internet. Uma bedinga i-kit yeSayensi bahlanganisa imali nezinye izikole ezingomakhelwane eziyidingayo iqashwe eThekwini.
“Ukuhlanganyela kuyasisiza ukuthi songe imali ngoba asikwazi ukuyiqasha sodwa ngoba kuyabiza,” kusho uMpompi.
UMpompi uqale ukuba uthishanhloko kulesi sikole ngo-2013. Phambilini wake waba nguthisha kuso wabuye wahamba.
Ngesikhathi efika uthe abazali bamtshela ukuthi banenqubo abayilandelayo yokuthi abafundi bagunde ukuze kungabonakali uma kunomfundi ontulayo. Bangitshele nezinye izinto eziyinqubo yesikole ababona ukuthi ziyasebenza.
“Babuye bathi le nqubo esetshenziswayo esikoleni ibisebenza ngesikhathi kusekhona uthishanhloko obengaphambili kwami. Bacela ukuthi uma kukhona engifisa ukukushintsha sibonisane ngakho ngaphambi kokuthi kushintshwe,” kusho uMpompi.
Bayisihlanu othisha bakulesi sikole abafunde kuso. Bonke bathi babevele befisa ukuzofundisa kusona ngoba sinomthetho.
UNksz Nobuhle Ngcongo, oqede u-matric ngo-2007 kulesi sikole, ufundisa isiXhosa kwaGrade 8 kuya ku-Grade 11. Uthe kulesi sikole akuvamile ukuthi kube nomfundi ofika sekudlule isikhathi.
“Abafundi abafika sekudlule isikhathi bayaluphazamisa uhlelo lukathisha. Njengoba nami ngike ngaba umfundi kusona ngiyazi ukuthi abafundi bayayilandela imigomo. Uma uwuthisha ubhekana nomsebenzi wakho ngokukhululeka,” kusho uNksz Ngcongo.