Uzolalela izikhalo zothishanhloko
UKUBA manzonzo kwesimo ezikoleni zakuleli sekuholele ekutheni kube nengqungquthela ephuthumayo yothishanhloko, ezoqala eThekwini kusasa.
Le ngqungquthela yezinsuku ezimbili ibizwe yinyunyana yothisha iNational Teachers Union (Natu). Izohanjelwa nanguNgqongqoshe weMfundo eyiSisekelo uNkk Angie Motshekga.
Iphini likaMengameli weNatu, uMnuz Allan Thompson lithe ukungasebenzeki ezikoleni zakuleli ngenxa yezinkinga, yikona okwenze babiza le ngqungquthela.
“Izinkinga ezikoleni zikhona kuzwelonke kodwa isimo sibi kakhulu KwaZuluNatal, kuvalwe amehlo. Yingakho othishanhloko abaningi abazothamela le ngqungquthela kungabesifundazwe. Isifundazwe sinothisha abangaqashiwe, abanye babambile kodwa abaholelwa. Baningi nasebeqede ukufunda kodwa abaqashwa ezikoleni. Kunezikole ezivalelwe ugesi namanzi, amanye amahhovisi avaliwe ngenxa yezinkinga. Zonke lezi zinkinga zenza kungasebenzeki kahle ezikoleni, kwehlisa nomfutho kothishanhloko,” kuchaza uThompson. Uveze ukuthi selokhu kuqale unyaka ziyanda izinkinga asebebikelwe zona ezikoleni ezahlukene. Ezinye zazo ubale ukugcwala ngokweqile kwamakilasi, ukungalethwa kwezincwadi nezingane ezingenabo othisha. Uthe kunezikole eziphucwe ilungelo lokuzithengela izincwadi, okuyinto engenzekanga ngendlela efanele. ‘’Sibize othishanhloko ukuze bazilethe bukhona izinkinga abanazo ezikoleni. Simeme ungqongqoshe ukuze azizwele, esithemba ukuthi kuzophuma izixazululo. Sifuna nokuthi othishanhloko babuyelwe yithemba ngoba uma bephela amandla kuzolimala ikusasa lemfundo yezingane,” kusho uThompson.
Uthe indlela isimo esibheda ngayo esifundazweni, bazophakamisa ukuthi kusetshenziswe umthetho iSection 100 ogunyaza umnyango kuzwelonke ukuthi ulawule owesifundazwe. Uthe bafuna uNkk Motshekga abatshele ukuthi yini ezovimba lokho ngoba isimo sesingaphezu kwamandla esifundazweni.
Kwabazoba yingxenye yale ngqungquthela ezoba seCoastlands Hotel, kubalwa iSA Council for Educators nohlaka olubheka ukuhlolwa kwabafundi baka-matric, uMalusi.
Okhulumela uMnyango weMfundo eyisiSekelo uMnuz Elijah Mhlanga ukuqinisekisile ukuthi ungqongqoshe usitholile isimemo futhi uzoba khona engqungqutheleni.
“Ngeke sikwazi ukuphawula ngeziphakamiso nezinkinga ezenze kwabizwa le ngqungquthela, singakazi ukuthi kuzokhulunywa ngani. Esingakuqinisekisa wukuthi ungqongqoshe uzolalela izikhalo kubonakale ukuthi kuyiwa kanjani phambili,” kusho uMhlanga.