Sukumani bazali nivikele ikusasa lezingane zenu

IYIPHI enye indlela esingachaza ngayo isiphakamiso sikaNgqongqoshe weMfundo eyisiSekelo, uNkk Angie Motshekga, sokuphinde kwehliswe imaki lokuphasa ngaphandle kokuthi uvuma ukuthi sebehlulekile njengomnyango? Ufuna ukwehlisa amamaki okuphasa komfundi ukuze adlulele kwa-Grade 7, 8 no-9.

Umnyango uphakamise ukuthi amamaki okuphaswa ngawo izilimi zebele ehliselwe ku-40%. Umfundi uzobe ephasile uma ethole u-40% kuzo no-30% kwezinye izifundo ezintathu.

Nakuba sikuqonda ukuthi ezweni lethu kunomlando wokufunza ingane yomuntu omnyama imfundo ebhedayo kodwa kunzima ukwamukela ukuthi emva kweminyaka engaphezu kwewu-20 kwaphatha uhulumeni wentando yabantu, izinga lemfundo yethu lithi umfundi udinga u-40% ukuze aphase ulimi lwebele. Lokhu kuyichilo futhi kufanele bazinuke amakhwapha abaphathiswe umsebenzi wokusicijela abaholi bakusasa.

Imfundo ethi umfundi akaphase ngo-40% izobakhiqhiza kanjani odokotela, onjiniyela nabanye ochwepheshe bakusasa?

Ethula imiphumela ka-matric ka-2017, ungqongqoshe wathi: “Uma sizophucula imiphumela yemfundo yethu, kumele siqhubeke nokuthuthukisa izinga lokufunda nokufundisa umfundi engakafiki kwaGrade-12.”

Useyikhohliwe yini le nkulumo uNkk Motshekga? Iyodwa kuphela into ezothuthuka uma siphumelela isiphakamiso esisanda kwenziwa – kuzonyuka isibalo sabafundi abazophasa kodwa bazobe bengaphumi nemfundo enohlonze futhi bazothwala kanzima ezikhungweni zemfundo ephakeme.

Kuyathokozisa ukubona ukuthi izinyunyana zothisha kazihambisani nesiphakamiso.

I-Sadtu ithe kuyakhathaza ukubona kulokhu kuqhubeka umkhuba wokwehlisa izinga lokuphasa kanti i-Naptosa ithe kufanele ukuthi zikhona ezinye izindlela zokusiza abafundi, enye yazo ethe wukwandisa izinhlelo zokujwayeza izingane ukufunda izincwadi.

Isiphakamiso sivulelwe umphakathi ukuthi uphawule ngaso. Siyathemba abazali yibona abazokusukumela kakhulu lokhu ngoba uma siphasa sizobe sibulala ikusasa lezingane zabo futhi sizobulala nezilimi.