Ufuna ukungenisa emazweni angaphandle oshaya owekwaito
USEFUNA ukungenisa ngaphandle kwaseNingizimu Afrika umculi we-kwaito waseThekwini oseneminyaka eyibambile, uSosha, osanda kukhipha i-albhamu yakhe entsha.
USibonelo “Sosha” Ngcobo, ukhiphe i-albhamu esihloko sithi Breakthrough enezingoma ezingu-17.
Ilama i-Under Quote ayikhipha ekupheleni kuka-2016 igabe ngezingoma okubalwa kuzo iGood Times neLooking Back.
“Ngiyiqambe ngokuthi yiBreakthrough ngoba ingivulela amasango ngaphandle kwaseNingizimu Afrika. Yilona thuba lami leli manje lokungena ngengoma. Ngifuna ukubakhombisa ngengoma. Wumdlalo lo, akuliwa, kumnandi siyazidlalela,” kusho uSosha.
Kule albhamu upike abaculi okubalwa kubo umfowabo uBullistic, Khanyi Nzuza, Mafa, Mbongeni Ngema noBhar. Uthe ishaya ngesigqi sekwaito yakudala esipholile, i-guzz. “Ingakho phela umculo wami udayisa ngoba ngishaya ngesitayela sakudala. Into yami (i-albhamu) uma ifika esitolo iyahamba. Ongangikholwa ngingamlinda sikhiphe kanye kanye. Kuyothi kuphela izinyanga ezintathu ngizobe sengithola into yami (isitifiketi esiqinisekisa ukudayisa) ngiyinameke odongeni,” kusho uSosha. Uqhube wathi: “Umculo engiwenzayo ngowamagrootman, okungabantu abanamandla okuthenga, yingakho ngidayisa.” Uthe akazimisele ngokuhambisana nesikhathi ashintshe isitayela ngoba akwenzayo kuyamsebenzela futhi nasemsakazweni izingoma zakhe bayazithanda. USosha, ophinde abe ngumdidiyeli, kulezi zinsuku uphusha ingoma ethi Phakamisa. Idlala emisakazweni nakwithelevishini kanti i-video yayo wayiqopha ngoDisemba. “Ngilungiselela ukuqopha ama-video ezingoma zami ezimbili ngoba ngifuna ukuphusha ngamandla. Azilime ziye etsheni, isukile manje.”