UZikalala nomfutho ngemisebenzi entsheni
UNGQONGQOSHE wezokuThuthukiswa koMnotho, ezokuVakasha neMvelo KwaZulu-Natal, uMnuz Sihle Zikalala, uthe kuyishwa ukuthi uma kukhulunywa ngabantu abacebile kubalwa abamhlophe kwazise yibona abaphethe umnotho waseNingizimu Afrika.
Ububha uthe bugcwele kwabamnyama kakhulukazi abesifazane nentsha.
Uthe eNingizimu Afrika kunomacaphunakusale (billionaires) abathathu abaphethe umnotho wezwe.
Uveze ukuthi imali yalabo bantu ingalinganiswa nomholo wabantu abangu-28 million abampofu bakuleli. Namhlanje, sifuna osomabhizinisi baxoxe ngamathuba omnotho akhona esifundazweni futhi bangene kwezobuchwepheshe besimanje ukuze kudaleke amathuba omsebenzi,” kusho uZikalala.
Uthe izingane eziqala isikole njengamanje zifundela imisebenzi engekho emakethe kodwa esazovela ngenxa yokuthuthuka kobuchwepheshe.
“Kubalulekile ukuthi intsha yethu ingene emabhizinisini ngoba abantu abampofu bagcwele ezindaweni esihlala kuzo kanti intsha eningi izulazula emgwaqweni ngenxa yokusweleka kwamathuba omsebenzi. Sifuna osomabhizinisi abancane bangene emkhakheni wezimayini, owezolimo, ukukhiqizwa kwempahla, ezasolwandle nezobuchwepheshe,” kusho uZikalala.
Uthe babeke uR18.9 million ukuqeqesha osomabhizinisi abancane.
Uveze ukuthi bakhiphe imifundaze engu-10 bayinika intsha engasebenzi, baxhasa abacwaningi abancane abangu-12 abazogxila kwiLocal Economic Development, baxhasa osomabhizinisi abangu-14 abasiza umphakathi, baphinde bathuthukisa ulwazi lwabantu abangu-38 abagxile ekuthuthukisweni komnotho KwaZulu-Natal.
Uthe u-99.9% wezinkampani zaseSwitzerland ngezosomabhizinisi abancane futhi yizona ezidala amathuba omsebenzi amaningi.
“Kufanele nathi sikopele eSwitzerland sithuthukise osomabhizinisi abancane ngoba yizinkampani zabo ezidala amathuba omsebenzi amaningi. Sinezinhlelo eziningi zokusiza osomabhizinisi abancane ezifana neGijima Local Competitiveness Fund egxile ekulahlweni ngendlela kwemfucuza yasesibhedlela. Sifake uR5 million kwiGijima kanti ukuqala kohlelo lokulahlwa kwemfucuza yasesibhedlela ngendlela ehlelekile kudale amathuba omsebenzi angu-25,” kusho uZikalala.
Uthe osomabhizinisi baKwaZulu-Natal bazokwakha izihlalo zamaToyota Quantum akade akhiwa eJapan phambilini, asezokhiqizwa eProspecton (eSiphingo).
Uthe batshale uR5 million bewuhulumeni kwathi iToyota Boshoku SA yafaka uR6.5 million.
Ukwakhiwa kwezihlalo kuzoqala ngoJuni, kuzodala amathuba omsebenzi ayisikhombisa. Osomabhizinisi bebeshaya izandla ngesikhathi ekhuluma uZikalala. Bazishaye kakhulu ethi uzoyiqeda nya imicikilisho evimbela osomabhizinisi abancane ukusebenzisana nohulumeni.
Uthe uzokwenza isiqiniseko sokuthi bakhokhelwa masisha uma beqeda umsebenzi nohulumeni, uma bengakakhokhelwa babolekwe imali yokuqhuba ibhizinisi ukuze izinkampani zabo zingawi.
“BesiseMozambique noMacingwane (Willies Mchunu, ngoMsombuluko) ukuze sitholele osomabhizinisi baKwaZulu-Natal amathuba okuhweba kuleliya lizwe. Kufanele sithi sithuthukisa umnotho ngaphakathi sibheke nakwamanye amazwe ukuze silethe uguquko kwezomnotho sidale namathuba omsebenzi,” kusho uZikalala.