Kuboshwe amadoda okuthiwa aqole ibhizinisi
KUBOSHWE amadoda amabili asolwa ngamacala okubamba inkunzi ibhizinisi, kwa-Z eMlaza.
Amadoda, abaneminyaka ewu-20 no-26, azovela enkantolo yeMantshi eMlaza ngecala lokubamba inkunzi nokuzama ukubulala. Indoda etholwe nesibhamu ibekwe necala lokutholwa nesibhamu nezinhlamvu okungekho emthethweni.
Okhulumela amaphoyisa KwaZulu-Natal, uColonel Thembeka Mbele, uthe ngoMsombuluko ngezithuba zawo-10 ekuseni, amadoda amabili angene esitolo ehlome ngezibhamu afuna ngodli imali nama-airtime.
Kuthiwa athathe lezi zinto ase eyabaleka ngezinyawo. Kuvulwe icala lokubamba inkunzi esiteshini samaphoyisa eBhekithemba. UColonel Mbele uthe amaphoyisa aphinde athola umbiko wokuthi kukhona esinye isitolo esibanjwe inkunzi kwa-AA abe eseya khona.
Ngesikhathi esendleleni eya kule ndawo amaphoyisa abone amadoda afana nalowo achaze ukuthi abebamba inkunzi abe esewabajaha. Kuthiwa amadoda adubulile ebhekise emaphoyiseni, nawo adubula kwalimala indoda eyodwa.
Womabili amadoda aboshiwe. Indoda elimele itholwe nesibhamu nezimpahla zokwebiwa. Iyiswe esibhedlela lapho iqashwe khona ngamaphoyisa.
UColonel Mbele uthe enye indoda iyiswe esiteshini samaphoyisa yavalelwa.
Uthe amaphoyisa asabheka isibhamu sesibili okuthiwa besiphethwe yindoda yesibili.
Khonamanjalo, kuboshwe indoda (34) eMlaza kwa-D ngesikhathi amaphoyisa enomkhankaso wokukhuculula izibhamu ezingekho emthethweni. Indoda itholakale nesibhamu esincane nezinhlamvu eziwu-22. Isibhamu besikade sisuswe izinombolo. Ivele izolo enkantolo.
UColonel Mbele uthe zombili izibhamu ezitholiwe zizohlolwa ukuthola ukuthi kazithinteki yini kwamanye amacala.