I-Ea Lla Koto isethubeni lokuvala isizini kahle
NAKUBA isizini ka-2017/2018 ingakasongwa kodwa ngeke kumangaze uma kuwukuthi abaphathi beFree State Stars sebevele bazishaya isifuba ngendlela iqembu labo elenze ngayo.
Kumele wukuthi abazisoli ngesinqumo abasheshe basithatha bexosha uSammy Troughton ngemuva kwemidlalo emithathu engawini kusaqala isizini. Baqashe uLuc Eymael waseBelgium ofike waphendula izinto.
Ngesizini edlule iqembu lisinde kancane ezembeni liqeda endaweni ka-14, lasindiswa wukuba namagoli angcono ukuthi lingayi kodlala kumaPlay-Off.
Njengamanje iStars iyibambe endaweni yesithathu kwi-log ye-Absa Premiership. Isiqoqe amaphuzu awu-37 emidlalweni ewu-23.
Uma ingaqhubeka nomgqigqo inqobe owangempelasonto bese ivunwa ngeminye imiphumela, ingazithola ihlukaniswe ngamaphuzu amathathu kuphela neMamelodi Sundowns ezihola phambli. Emaqenjini abanga isicoco, iSundowns izobe ingadlali kule mpelasonto. Izogijima umdlalo womzuliswano wesibili weCAF Champions League neRayon Sport yaseRwanda.
Ngaphezu kokuhlala endaweni enhle kwi-log, i-Ea Lla Koto idlulele kumaquarterfinal eNedbank Cup ihlula iChippa United ngo 2-1 ngempelasonto.
NgoMgqibelo amaqembu azophinde ahlangane koweligi eSisa Dukashe Stadium ngo-3.30 ntambama. U-Eymael uthe sebebheke amaphuzu amahlanu emidlalweni yeligi, azoqinisekisa ukuthi abasagudluki kwi-Top 8.
“Kumele sibhekane nomdlalo ngamunye. Ngihlezi ngisho ukuthi angisiye umqeqeshi okhetha imidlalo, yonke ibalulekile. Kunabadlali abathole amakhadi aphuzi okusho ukuthi kuzomele ngenze izinguquko. Ukuwina kuyasiza ekuzethembeni, yilokho esizolwela ukuqhubeka nokukwenza ngoba sizimisele ngokuhlala kwiTop 8. Uma siqoqe amaphuzu amahlanu (emidlalweni esele) sizoba khona. Amanye esizowathola ngemuva kwalokho azobe esecacisa ukuthi siqeda sihlezi kuphi kwi-log,”kusho u-Eymael kwi-SS4.
Uthe usafuna babe bukhali phambi kwamapali.
“Esiwombeni sokuqala siwakhile amathuba kodwa besililahla ibhola ekugcineni. Kuzomele sikulungise lokho.”
UVladislav Heric obekwiRoyal Eagles kodwa osepheka iChippa ukhale ngokungaqini ngokwanele kwabadlali bakhe. Uthe indlela afuna badlale ngayo idinga abadlali abangekho ntekenteke.
“Asikwazanga ukuziqeqesha kahle. Ezinye izinto ebengizibona zizoba yingozi (kwiFree State) asikwazanga ukuzilungisa. Indlela esidlale ngayo ibingeyinhle kahle, bekumele sibaphuthume ekubavaleni kodwa ukungabi qatha kahle kwabadlali kwenze sahluleka wukwenza lokho,” kusho uHeric othathe izintambo ngemuva kokuxoshwa kukaTebogo Moloi.