OweCeltic uvuma iphutha kuze kuteleke abadlali
USIHLALO weBloemfontein Celtic, uMax Tshabalala, uvuma iphutha lokungabakhokheli abadlali imali yokusayina izinkontileka ezintsha neqembu, okugcine ngokuthi bateleke.
Ngempelasonto, abadlali beCeltic badube ukujima ngemuva kokuthi iqembu lingazange lisigcine isivumelwano sokubakhokhela imali yabo. Lokhu bakwenze ngoMgqibelo ngaphambi komdlalo weNedbank Cup Last 16, abahlule kuwo iRichards Bay FC ngeSonto.
Ngokuthola kweSolezwe bakhona abadlali abayithola imali ngaphambi komdlalo kodwa kuze kwashaya uLwesibili ntambama abanye bengakakhokhelwa, okwenze baphinde badube ukujima.
“Kuyiqiniso okubikiwe. Kodwa kusukela namuhla (izolo) abadlali bonke sebekhokheliwe. Siyavuma iphutha libe ngakithina. Abadlali bekuyilungelo labo ukuthi balwele okubafanele. NgoLwesihlanu sabathembisa ukuthi bazokhokhelwa kodwa ngenxa yezinkinga zemali emabhizinisini sangakwazi ukubakhokhela bonke. Mhlawumbe u-40% wabo owakhokheleka. Kudingeke ukuthi sibakhokhele ngamaqoqo. Yingakho ngithi siyaxolisa kubona nakubalandeli bethu ngoba le nto ayakhi isithombe esihle ngeqembu,” kusho uTshabalala.
Iqembu likaTshabalala alikho embangweni wesicoco se-Absa Premiership kodwa lilwela iTop 8 njengoba lihleli endaweni yesishiyagalolunye kwilog.
Uma lingaqeda kwiTop 8 lizothola imali engekho ngaphansi kuka-R1 million.
ISiwelele siyazama emidlalweni yomkhumulajezi. Sihlulwe kowamanqamu weTelkom Knockout saphunyukwa yisheke likaR4 million. Iqembu ligcine lithole umthobanhliziyo kaR1.5 million.
Ngokudlulela kuma-quarterfinal eNedbank Cup selizohlomula ngoR400 000. Ompetha balo mqhudelwano bathola uR7 million. “Akulula ukuphatha iqembu lebhola. Sithola uR4 million kuphela kubaxhasi bethu unyaka wonke. Leyo akuyona imali ongagcina ngayo izidingo zeqembu lebhola. Okusho ukuthi kudingeka sisebenzise imali yamabhizinisi ethu siyifake ebholeni.
“Mhlawumbe abantu bazitshela ukuthi ngikhuluma ngemali engatheni obekumele ngiyikhokhele abadlali. Lapha ngikhuluma cishe ngemali elinganiselwa kuR9.1 million okumele ikhokhwe. Uma kukhulunywa ngemali yesivumelwano sezinkontileka, abanye abadlali bakhokhelwa uR1 million noma uR500 000. Kodwa engikugcizelela kakhulu wukuthi siyaxolisa kubona. Benze okufanele futhi akekho ozojezizwa,” kusho uTshabalala.