Uhlelo lokuqapha imali ye-internet
UKWANDA kwemali ye-internet nezinkampani ezihweba ngobuchwepheshe besimanje kuholele ekutheni iBhange loMbuso, iSouth African Reserve Bank (SARB) lakuleli lisungule uhlelo oluzobhekela lolu hlobo lwamabhizinisi.
Lolu hlelo olubizwa ngeFinancial Technology (FinTech) Programme lusungulwe yiSARB kulo nyaka ukuqinisekisa ukuthi abantu bayavikelwa engozini yamabhizinisi obuchwepheshe besimanje nokuthi bathola inzuzo efanele.
Esitatimendeni abeSARB baveze ukuthi uhlelo lweFinTech luzogxila ekusizeni abenza umthetho ukuthi babhekele abantu bakuleli, baqiniseke ukuthi abaxhashazwa njengoba sekukhona nemali yaku-internet ebizwa nge-crypto currency. Kuzobhekwa izigaba ezintathu, esokuqala wukubheka ukuthi ingalawulwa kanjani imali ye-internet, ngabe ayiphazamisi ukusebenza kwemali ezweni, kubhekwe nodaba lwezokuphepha.
Kuzobhekwa ukuthi le mali inamuphi umthelela ekuqoqweni kwentela, kuvikelwe nabathengi balolu hlobo lwemali. Kuzobhekwa nodaba lokushushumbiswa kwemali. I-SARB ilindele ukubona imiphumela ekoteni yesibili yonyaka.
Isigaba esebili wukuthi iSARB izobamba liphi iqhaza ekulawuleni imali yalolu hlobo lokutshalwa kwemali. Esesithathu wukwethulwa kohlelo olubizwa ngeProject Khokha oluzobheka ukuthi lezi zinkampani zizoba namthelela muni emabhange nokuthi zizokushintsha kanjani ukusebenza kwalo mkhakha. Kuzobhekwa nokuthi kwamanye amazwe zilawulwa kanjani.
IConsenSys, okuyinkampani egxile kulo mkhakha wezobuchwepheshe bemali izosiza iSARB ngesikhathi yenza ucwaningo kulo mkhakha.
Lolu cwaningo kufanele lucacise ukuthi yikuphi okuhle ngemali ye-internet, okubi kanjalo nezinkinga ezihlangabezana nabathengi.