IKings seyimfune yancama onyamalale ezama inhlanhla
AKAZIWA ukuthi ukuziphi izinkalo umdlali odume kwiKaizer Chiefs obezama inhlanhla neReal Kings egijima kwiNational First Division (NFD).
Emasontweni amabili edlule leli phephandaba like labika ukuthi iKings ehlezi endaweni yesibili kwilog ihlola uMichelle Katsvairo osanda kuhlukana neChiefs.
Kuthe kusenjalo lo mdlali wehlelwa ngumsophi eshonelwa nguyise okuphoqe ukuthi abuyele kubo eZimbabwe.
UTom Dlamini wezokuxhumana kwiKings utshele Isolezwe ukuthi sebegeze izandla ngoKatsvairo.
“Abaphathi abasayingeni ekaKatsvairo. Mfowethu lo mfana samthengela ithikithi lendiza lokuthi aye kubo eZimbabwe ukuyofihla uyise bese eyabuya. Samthengela amathikithi amabili elokuya eZimbabwe nelokubuya. Kuyavela ukuthi ubuyile kodwa sesimzame sancama ocingweni lwakhe. Akalubambi ucingo. Asisazimisele ngokumncenga manje ngoba kusobala ukuthi umqondo wakhe ukwenye indawo,” kusho uDlamini.
UKatsvairo ufike eNingizimu Afrika ngesizini edlule ethwelwe ngeqoma ukuthi uzofike aqhulule imvula yamagoli kwi-Absa Premiership. Uqale kahle kuMakhosi kodwa walimala okwenze wahlala isikhathi eside. Ubuye indawo yakhe ingasekho. Umqeqeshi weChiefs uSteve Komphela ubesesebenzisa uBernard Parker noGustavo “Maleveni” Paez.
Ekuqaleni kwesizini ubolekiswe kwiSinginda United yaseTanzania. Ufike kuyona waqhulula amagoli kodwa wagcina ehlukene nayo ngoba ibisihluleka wukumkhokhela.
Ubuyele kwiChiefs kodwa kwacaca ukuthi akanayo indawo ngoba leli qembu libophele uLeonardo Castro, Ryan Moon, Paez noParker phambili. Bagcine bevumelene ngokuthi bahlukane neChiefs.
Kuthintwa imenenja yakhe uMike Ngobeni we-M-Sport Management naye uthe uphoxekile ngesenzo salo mdlali.
“Lo mfana nami sengimzame ngehluleka. Ungiphoxile kakhulu. Akwenzile akuyona into enhle,” kusho uNgobeni.
NgeSonto ngo-3.30 ntambama iKings izodudulana neBlack Leopards eKing Zwelithini Stadium, eMlaza. Imidlalo yeNFD: NgoMgqibelo ngo-3.30 ntambama: Tshakhuma Tsha Madzivhandila v Richards Bay (Thohoyandou Stadium); Mthatha Bucks v Uthongathi FC (Mthatha Stadium); Super Eagles v Royal Eagles (Goble Park); Pretoria University FC v Witbank Spurs (ABSA Tuks Stadium); Highlands Park v Mbombela United (Makhulong Stadium)
NgeSonto ngo-3.30 ntambama: Real Kings v Black Leopards (King Zwelithini); Jomo Cosmos v Ubuntu Cape Town (Vosloorus Stadium); Cape Town All Stars v Stellenbosch (Parow Park)