Wethweswe iziqu uCaster Semenya
ZIYIHAMBELA kahle izinto ingqwele yomhlaba kwi800m yabesifazane, uCaster Semenya, (osesithombeni) othole iziqu zakhe kuleli sonto emkhakheni weSports Science eNorth West University.
USemenya uveze lezi zindaba ekhasini lakhe le-instagram ngoLwesibili, efaka isithombe sakhe egqoke ijazi lezifundiswa enze uphawu lokucijisa izandla phezu kwamahlombe ajwayele ukulwenza ngemuva kokunqoba imijaho.
Lena kubukeka kuyinyanga ezomphatha kahle uSemenya. Ngempelasonto edlule wephule irekhodi leminyaka engu-35 kwi1000m.
Le mpelasonto kungenzeka iphele esasigcinile isicoco sakhe sakuleli kwi-800m nakwi-1500m njengoba kuqhubeka imidlalo ye-ASA National Championship eTuks Stadium, ePitoli.
USemenya ufudukele eNorth West ngo-2015 ngemuva kokuhlukana nowayengumqeqeshi wakhe uMaria Mutola. Ngokusho kwale ntokazi yaseLimpopo, lesi kwakuyisiqalo “esisha empilweni” ngemuva kwesigameko sika-2009 lapho yayisolwa ngokuthi ayikufanele ukugijima nabesifazane ngenxa yendlela edaleke ngayo.
“Le ndawo ithule. Akukho okuningi ongakwenza kuyona ngaphandle kokujima, ukudla, ukulala nesikole. Ngifunda iSports Science ngoba ngathatha ikhefu ngemuva kuka-2009 ukuze ngilungise impilo yami,” kusho uSemenya kweminye imithombo yabezindaba.
Kusukela lapho lo mgijimi akabange esabheka emuva enqoba igolide kuma-Olympic ngo-2016 kwi-800m. Unyaka wonke odlule akekho omehlulile kuleli banga edla ubhedu kwiIAAF Diamond League nakwiIAAF World Championship, nethusi kwi-1500m.
Kulo nyaka kubhekwe ukuthi aqhubeke nokuphakamisa ifulegi lakuleli kumaCommonwealth Games aseGold Coast, e-Australia ngo-Ephreli. Nyakenye u-Akani Simbine oyibamba kwi-100m ugcine ezitholile iziqu zakhe ze-Information Science e-University of Pretoria ngemuva kweminyaka emihlanu ezenza.