UNandi uzobadida ngengqephu kwiBET
USENGENE ekudidiyeleni izinhlelo zethelevishini uNandi Madida ozoba nohlelo lwengqephu kwiBET (DStv channel 129), iMade in Afrika ngenyanga ezayo.
UNandi (29) ngeke kuphela agcine ngokuba wumdidiyeli omkhulu walo kodwa uzobuye alethule.
Uthe bakholelwa ekubumbaneni kwabantu base-Afrika ngakho uhlelo akusilona olwabantu baseNingizimu Afrika kuphela.
“Abenzi bohlelo bakhethe ukuqhakambisa ithalente kwezengqephu kulo lonke izwekazi,” kusho uNandi ekhasini lakhe eliqinisekisiwe le-Instagram
Uthe uyachichima yinjabulo ngokuthi uzoba wumdidiyeli nomethuli wohlelo.
Uhlelo luzobe lukhombisa abasiki bengqephu abasafufusa bakuzo zonke izinkalo e-Afrika bebanga ukuqokwa njengomakhonya emkhakheni wemfashini. Esiqeshini ngasinye kuzobonakala ongoti bemfashini bekhuluma ngokuthi yimiphi imisiko engenisile nokuthi kwenzekani kulo mkhakha.
“IMade in Afrika izokwenza okungakaze kwenzeke emlandweni ukuthi kube khona ithimba elihlanganisa umethuli nabantu abasemkhakheni wemfashini bakhulume ngesihloko esithile semfashini esihambisana nendikimba yesiqephu. Ithimba lizobe libunjwe ngosaziwayo nongoti bengqephu e-Afrika,” kusho umbhalo ochaza ngohlelo kwi-website yakwaBET Africa.
Esiqeshini ngasinye ababukeli bazokwazi kangcono ngabasiki ababili abakhethwe e-Afrika yonke lapho bezoncintisana khona kuleso siqephu bese benza umsiko ngokwendikimba abazonikezwa yona.
Bawu-18 abasiki abazobonakala futhi njalo ngemuva kwesiqephu owinile uzothola izindwangu zika-R1 000. Ekugcineni umsiki ozophuma phambili uzohlomula ngomklomelo ka-R500 000.
UNandi uyaziwa ngokuthi uyazifela ngengqephu. Muva nje ubeyokhombisa ngemisiko yakhe iColour by Nandi Madida embukisweni iNew York Fashion Week.
Imininingwane yokungenela itholakala ku-www.betafrica.tv. Kuvalwa kusasa.
IMade in Afrika kulindeleke ukuthi iqale ukukhonjiswa ngenyanga ezayo. AbeBET bathe basaphothula yonke imininingwane bese benza isimemezelo.