Umfundisi kwelezinsolo zokunukubeza abazukulu
ZIMKHALELE umfundisi waseZiyoni (65) eGreytown osolwa ngokudlwengula abazukulu bakhe ephindelela.
Kuthiwa lezi zingane zaseNseleni eGreytown, ena-13 nena-16, amagama azo agodliwe ukuzivikela, bezihlala nomkhulu wazo ongumfundisi, emuva kokushona kukanina wazo nogogo.
Okhulumela amaphoyisa KwaZulu-Natal, uCol Thembeka Mbele ukuqinisekisile ukuthi lo mlisa uboshelwe amacala okudwengula.
“Kusolakala ukuthi izigameko zokudlwengulwa kwezingane zenzeke phakathi kuka-Okthoba 10, 2017 no Mashi 4 kulo nonyaka,” kusho uCol Mbele.
Kuthiwa ingane encane ibonwe ngothisha besikole samabanga aphansi efunda kusona ihamba ngendlela engajwayelekile ngoMsombuluko, bayibuza ukuthi ilimele yini.
UMnuz Bonginkosi Chonco ongusihlalo wenhlangano elwela abantu abaphila negciwane lengculazi, iNational Association of People Living with HIV and AIDS (Napwa) osebenzisana nomphakathi wasendaweni, uthe bathole ukuthi othisha bacele udadewabo wabo ofunda esikoleni esifanayo, baxoxa naye wagonyuluka.
“Othisha bathinte osonhlalakahle bafika baxoxa nezingane nothisha base beziyisa esibhedlela, kwaqinisekiswa ukuthi zidlwenguliwe. Kubikelwe amaphoyisa ambopha umkhulu wazo,” kusho uChonco. Uthe lesi sigameko sishiye umphakathi ukhathazekile ngoba bezikhona izinsolo zokuthi umkhulu udlwengula umzukulu wakhe omdala kodwa ingekho indlela yokuqiniseka ngalokhu.
Uthe umphakathi uhlele ukuba nemashi uma umkhulu esevela enkantolo ngoba uyasihlaba isenzo asolwa
ngaso. Ikhansela, uMnuz Mbangiseni Yengwa lithe bashaqekile ngoba umkhulu wezingane ubehlonishwa endaweni njengoba ebengumfundisi. Ubonge othisha ngokusukumela phezulu. Umsolwa uzevela enkantolo maduze.