Bakhala ngokuphathwa ngendluzula kothishanhloko ezikoleni
UKHALE ngokuhlukumezeka kothishanhloko uMengameli weNational Teachers Union (Natu), uMnuz Siphosethu Ngcobo ngenkathi evula ingqungquthela yabo eThekwini izolo.UNgcobo uthe othishanhloko badinga ukupholiswa ingqondo ngendlela abahlukemezeka ngayo ezikoleni naseMnyangweni weZemfundo. Ukhale ngokubukelwa kwabo phansi, wathi banikezwa nemiyalelo abangenalo igunya lokuyiphikisa ngisho bengahambisani nayo.
“Kungcono esibhedlela ngoba uma isiguli singayitholanga imithi siyafa singcwatshwe. Lana sinothishanhloko abayizidumbu behamba.
“Lokhu abasuke bekuveza embikweni ohanjiswa eMnyangweni weZemfundo kuzwelonke, kusuke kungamanga. Basuke bezama ukufihla amahlazo benze sengathi konke kuhle,” kusho uNgcobo.
Ukhale ngezimenenja zamasekethe athe zithethisa othishanhloko kube sengathi yizingane ngoba zibona bengelutho. Ugcizelele wathi umnyango wenzelwe ukweseka othisha kuphela kodwa othishanhloko ababhekana nobunzima.
“Othishanhloko ngabe bakhiqiza imiphumela engcono kakhulu ukube bathola konke abakudingayo. Kumanje kukhona abangenazo izinto zokusebenza, ezinye azifikanga ngesikhathi,” kusho yena.
Uthe kumele kuphele ingqungquthela namuhla begonyuluke konke okubahluphayo ezikhulwini zomnyango ukuze babuyelwe yisithunzi.
Iphini likaMengameli weNatu, uMnuz Allan Thomspson ukhale ngokuthi imfundo yamahhala esanda kuphasiswa izohlomulisa kakhulu abafundi abaphasa kahle ngoba benazo izinsiza kufunda. Uthe kunezingane ezisezikoleni ezisemakhaya ezisuke ziqala ukubona ngisho ikhompyutha ezikhungweni zemfundo ephakeme.
UDkt Mafu Rakometsi, oyisikhulu sohlaka olubheka ukuhlolwa kuka- matric uMalusi, ukhuthaze othishanhloko ukuthi baziqeqeshele othisha, ukuze kuthuthuke izinga lokumaka. Uthe ezinye zezinselelo ababhekana nazo wukuthi kunothisha abangamaki ngendlela. Ugcizelele ukuthi imaki lomfundi alichazi izinga kwezemfundo.
“Kunabantu abakhala ngokuthi izinga lemfundo lehlile ngoba kwehliswe amamaki okuphasa. Inkinga yokwehla kwezinga kwezemfundo ikhona wonke amazwe ngoba abafundi bafundela ukuphasa hhayi ukwazi.
“Uma kuphaswe kakhulu kumatric kugxekwa uMalusi ngokwehlisa amamaki okuphasa. Uma sithanda singathi izifundo aziphaswe ngo-50% bese sithambisa ekusethweni kwamaphepha kodwa ngeke kusize ngoba izingane zizobe zingazi lutho,” kusho yena.
Uchaze nangokucutshungulwa kamaphepha ka-matric athe akuyona inhloso ukufeyilisa nokuphasisa abafundi kodwa bafuna bathole lokhu okubafanele. Le ngqungquthela ihlanganisa othishanhloko beNatu kuzwelonke ukudingida izinkinga ezisezikoleni.