ICosatu nohla lwezimfuno kuMengameli Ramaphosa
ICOSATU yexwayise uMengameli Cyril Ramaphosa ngokuthi izoyeka ukumeseka uma engawaqedi ama-labour broker, engaluqali uhlelo lwe-National Health Insurance, noma futhi engabanikezi abantu abampofu i-Wi-fi yamhhala.
Lesi sixwayiso sikhishwe yiPhini lesibili likaMengameli weCosatu, uNksz Zingiswa Losi izolo.
UNksz Losi ubekhuluma engqungqutheleni yezinduna zeSouth African Clothing and Textile Workers Union ebiseThekwini.
Uthe iCosatu ibe neqhaza elibalulekile ekuqinisekiseni ukuthi uRamaphosa uqokwa njengoMengameli we-ANC yaphinde yacela ukuthi kuhoxiswe uMnuz Jacob Zuma esikhundleni sokwengameli izwe.
Uveze ukuthi ngeke iCosatu ihlale yeseka uRamaphosa uma engalungisi izinkinga ezihlalise kabi abasebenzi nabantu abampofu.
“Kufanele i-ANC izibophezele ekuletheni izimfuno zeCosatu okubalwa kuzo uguquko kwezomnotho, imfundo yamahhala nokuqedwa kwama-labour broker. Seziphelile izinyanga ezintathu ephethe uRamaphosa kufanele aqinisekise ukuthi amalungelo abasebenzi ayahlonishwa nezimfuno zabo bayazithola,” kusho uNksz Losi.
Utshele izinduna ukuthi zibike abaqashi abangawulandeli umthetho abaqhubeka nokwenza abasebenzi amatoho bangabaqashi ngokugcwele noma sekudlule izinyanga ezintathu.
“Umthetho ucacile ekutheni abantu kufanele bangabi yitoho ingunaphakade.”
Uthe iCosatu izoqhubeka nomkhankaso wokulwela ukuthi kuhoxiswe ukukhokhelwa kwama-e-tolls eGauteng.
“Uma sifuna kunyuswe amaholo leyo mali ithathwa ngama-etolls. Sifuna kuqale uhlelo lwezempilo iNHI, abantu abangasebenzi bathole isibonelelo sikahulumeni kube negaranti yokuthi abasebenzi bazosebenza amahora angu-40 ngesonto. Sifuna ne-wi-fi yamahhala ezindaweni zasemakhaya,” kusho uNksz Losi.
Uthe bafuna lezi zimfuno zifezeke ukuze umbimbi luhlale lunobudlelwano obuhle. UNksz Jemmy Schreiner, oyilungu lesigungu esiphezulu se-SACP, uthe akufanele umbuso usetshenziswe yidlanzana noma kucatshangwe umndeni wakwaGupta kuphela uma kukhulunywa ngalolu daba.
“Kufanele kubhekwe nezinkimpani ezinkulu ezifuna ukusebenzisa umbuso ukufeza izinhloso zazo,” kusho uNksz uSchreiner.