UMabuza ufuna incazelo kuGigaba
IPHINI likaMengamelwe wezwe, uMnuz David Mabuza, libhalele uNgqongqoshe wezaseKhaya uMnuz Malusi Gigaba, lifuna achaze ukuthi kungani engafikanga ephalamende ukuyophendula indaba yokunikwa ubuzwe kwamalungu omndeni wakwaGupta.
Incwadi ibhalwe emuva kwezikhalo ezivela emaqenjini aphikisayo acele uSomlomo, uNksz Baleka Mbete ukuthi acele uMabuza ukuthi afune incazelo yokulova kukaGigaba.
UGigaba akusiye yedwa obhalelwe incwadi kodwa noNgqongqoshe wezangaphandle, uNksz Lindiwe Sisulu ucelwe ukuthi achaze ukuthi kungani engafikanga ephalamende ngesonto elidlule.
Kuleli sonto uGigaba uphekwe ngemibuzo yokuthi wawusiza kanjani umndeni wakwaGupta ukuthi uthole izinkontileka ezinkampanini zikahulumeni.
UNksz Mbete utshele amalungu ephalamende ukuthi udaba lukaGigaba luphethwe nguMabuza ozolulungisa.
Izolo umeluleki wazindaba zasephalamende kaRamaphosa, uMnuz Gerhard Koornhof, uthe uMabuza usebhalele uGigaba noSisulu futhi uqale ukulungisa lolu daba kusuka ngoLwesihlanu oludlule.
“Inkinga yokulova kwamalungu ephalamende ilungiswa nguMabuza. Kufanele silinde yena asitshele ukuthi uzothatha ziphi izinyathelo,” kusho uKoornhof.
Ngesikhathi uGigaba ephekwa ngemibuzo uphikile ukuthi uneakhawunti eDubai nokuthi umndeni wakwaGupta wamupha u-R500 000 awunika intombi yakhe.
Ngesikhathi kuthiwa makazophendula imibuzo ngokunika ubuzwe amalungu omndeni wakwaGupta wakhala ngokuthi uyagula.
Uthe akusiwo wonke amalungu omndeni wakwaGupta anikezwa ubuzwe kodwa uhulumeni waseIndia uthe abakwaGupta banobuzwe baseNingizimu Afrika ngoba e-India awuvumelekile ukuthi ube nobuzwe bamazwe amabili.
Akusiye yedwa uGigaba olovayo ephalamende uma ebiziwe njengoba indodana kaMnuz Jacob Zuma, uMnuz Duduzane Zuma ingakaze ilubeke ephalamende, kanjalo nowayenguSihlalo wakwaSAA, uNkk Dudu Myeni.
UNkk Myeni ukhale ngokuthi uyagula waze wahambisa nencwadi kadokotela.
Amalungu omndeni wakwaGupta athe ngeke avele ephalamende ngoba awekho eNingizimu Afrika.
UGigaba nguNgqongqoshe wesibili ukuphekwa ngemibuzo ephalamende elandela uNksz Lynne Brown owayebuzwa ngokusetshenziswa kwezinkampani zikahulumeni yidlanzana.
UNksz Brown wesula ephalamende emuva kokukhishwa esikhundleni sokuba nguNgqongqoshe wamaBhizinisi kaHulumeni nguRamaphosa.