Isiqinisekiso sokuholwa kwezibonelelo
UNGQONGQOSHE wezokuXhumana eNingizimu Afrika, uNkk Nomvula Mokonyane, uthe phansi amaphaphu kwabahola izibonelelo zikahulumeni njengoba iSouth African Social Security Agency (Sassa) imnike isiqiniseko sokuthi izibonelelo zizokhokhwa ngaphandle kwezihibe ngo-Ephreli 1.
UNkk Mokonyane uveze lezi zindaba izolo esithangamani nabezindaba ebesiseKapa.
UNkk Dianne Dunkerley obhekele izinhlelo zokukhokhwa kwezibonelelo zikahulumeni kwaSassa uthe inkampani ezongena esikhaleni seCash Paymaster Services (CPS) izomenyezelwa maduze ukuze kuthi kufika u-Ephreli 1 ibe isikulungele ukuholela abantu.
Ukufakwa kwezicelo zamathenda kuvalwe ngoMashi 12 kodwa ukuqinisekisile ukuthi abantu bazohola ngo-Ephreli ngisho labo abahola ezikhungweni.
Uthe abantu bazohola emabhange, eposini, ezitolo nasezikhungweni njengoba bekuvele kwenzeka.
Abaseposini bathe bakulungele ukuholela abantu futhi bazokwenza isiqiniseko sokuthi bayabika ngazo zonke izinhlelo zabo.
UNkk Angie Richardson wenhlangano esiza umphakathi, iBlack Sash, uthe vele izibonelelo zizokhokhwa kodwa inkinga wukuthi kuzokwenzekani kubantu abahola ukheshi ezikhungweni uma inkontileka yeCPS ingavuselelwa.
“Okwamanje sizolinda isinqumo senkantolo yomthethosisekelo esizophuma namhlanje ngaphambi kokuphawula kabanzi ngodaba lwezibonelelo. Okusikhathazayo wukuthi akucaci ukuthi abantu abahola ukheshi ezikhungweni kuzokwenzekani ngabo njengoba sekuphela inkontileka yeCPS. Mhlawumbe izolulwa inkontileka, mhlawumbe izophela kodwa azikho izinhlelo ezicacile zokuthi abahola ukheshi kuzokwenzekani kubona,” kusho uNkk Richardson.