Owasiza uGwala wayengazitsheli ukuthi uzophila
INDLELA umgijimi uMhlengi Gwala ayopha ngayo, umphathi wonogada owamhlenga uthi wayengazitsheli ukuthi wayezophila. “Ngangicabanga ukuthi uyashona. Ngesikhathi sifika esibhedlela ngimfaka esihlalweni esihamba ngamasondo, ngezwa sengathi uyaphela. Ngathi kuye ‘cha baba, qina’.
“Wayelimele kakhulu, kukubi,” kusho uMnuz Themba Gumede.
Lo mphathi wonogada oneminyaka engu-35 osebenza kwaFidelity Security wayehamba ngomgwaqo uRick Turner (Franscois) eya kobheka umsebenzi kwenye indawo abasebenzela kuyo ngesikhathi ephazamisa enganakile abantu abathathu ababezama ukusika imilenze kaGwala ngesaha.
Kukholakala ukuthi bama bebona amalambu eveni eyayishayelwa uGumede. Ekhuluma nephephandaba elinguzakwabo waleli iThe Mercury, uGumede ulandise ngokwenzeka.
“Ngabona indoda imi ngomlenze owodwa iphethe ithoshi ingimisa. Ngaqale ngazitshela ukuthi amaphoyisa kodwa ngathi uma ngisondela ngabona ukuthi wayephethe izinto zokujima, ngase ngicabanga ukuthi unamajaqamba noma okunye.”
Ngesikhathi ema uGumede, uGwala owayexhuga wavula isicabha somgibeli waziphosa esihlalweni.
“Wavele waziphosa emathangeni ami ekhala ‘ngicela ungiyise esibhedlela’. Kwakumele ngigade ikhanda lakhe ngesikhathi ngishayela. Uthe endleleni ebheke eNkosi Albert Luthuli Central Hospital, uGwala wayekhala ethi ngeke esakwazi ukubona izingane zakhe zikhula.
Befika esibhedlela watshelwa ukuthi akafake uGwala esihlalweni esihamba ngamasondo.
“Ngabeka izandla zami ngaphansi kwezingalo zakhe ngamphakamisa ngambeka esihlalweni.
Uthe washiya uGwala esibhedlela ngemuva kwamahora amabili.
Uthe wayehlele ukuthi amvakashele kodwa wezwa ezindabeni ukuthi useyiswe kwesinye isibhedlela esingashiwongo.
“Kuyilapho ngezwa khona ukuthi ngumuntu owaziwayo. Kodwa mina ngangisiza umuntu owayedinga usizo. Uma usiza umuntu awukwenzi ngoba ulindele ukuthi uzokwenzela into noma uzokubonga.
“Ngakwenza ngoba kusegazini ukuthi ngisize. Yindlela engakhuliswa ngayo. Kumina, udumo lusekusizeni leya ndoda, hhayi udumo lwamanje,” kusho uGumede. NgoMgqibelo, uGumede uvakashele uGwala wamukelwa ngezandla ezifudumele wumndeni wakhe.
“Wathuka uma ezwa ukuthi ngiwubani ngesikhathi bemtshela ngoba wayesezinhlungwini engakwazi ukungibona ngaloluya suku. Wangibonga. Ungumfowethu, ngingumfowabo futhi ngifuna ukuthi adlule kulokhu abe nekusasa eliqhakazile,” kusho uGumede.