I-listeriosis izolahlekisela abantu ngomsebenzi
INYUNYANA yabasebenza ngokudla iFood and Allied Workers Union (FAWU) ithi kuzoqeda imisebenzi ukusabalala kwemibiko engacacile yesifo esitholakala ekudleni i-listeriosis.
Izolo uNobhala Jikelele weFawu, uMnuz Katishi Masemola, uthe kufanele uNgqongqoshe wezeMpilo, uDkt Aaron Motsoaledi, acacise ukuthi akusiyo yonke inyama egayiwe enobuthi ngoba abantu sebesaba kwasani egayiwe.
“Sithole ukuthi abantu sebesaba ukuthenga inyama egayiwe, abanandaba ukuthi ngeyakwa-Enterprise noma upolony wakwaRainbow. Sebesaba yonke into egayiwe. Sifisa uDkt Motsoaledi asho ukuthi enye inyama ayinabo ubuthi ngoba abantu bazophelelwa wumsebenzi,” kusho uMasemola.
Uthe bafuna uMotsoaledi asho ukuthi inyama egayiwe yakwa-Escourt ayinankinga wathi upolony wakwaRainbow okusathiwe abantu abame kancane ukuwuthenga kodwa eminye imikhiqizo yakhona ayinankinga.
“Ukungathengwa kwenyama egayiwe engasuswanga emashalofini asezitolo kuzoqeda imisebenzi yabantu. Kuzovula ithuba lokuthi amazwe angaphandle afake inyama yawo egayiwe njengoba kwenzeka ngamaphisisi enkukhu aqeda imisebenzi embonini yezinkukhu kuleli,” kuchaza uMasemola. Uthe bafuna ngaphambi kokuthi uMotsoaledi akhulume abe nobufakazi obugcwele yokuthi imiphi imikhiqizo ethintekayo, acacisele abantu futhi behlise nomoya ngoba akuwona wonke upolony unobuthi. “Kufanele uMotsoaledi acacise ukuthi akusibona bonke opolony, amaviyena nama-russian anenkinga ngoba uma abantu sebesaba upolony okusho ukuthi abasebenzi bazodilizwa. Asifuni ukubona isibalo sabantu abangasebenzi sikhula yingakho sifuna icaciswe into etshelwa isizwe,” kusho uMotsoaledi.