Kuyenzile indaba ukwenyuka kwentela kaphethroli
KUZOGUGA iphakethe kubathengi ngoEphreli njengoba uphethroli kulindeleke ukuthi unyuke ngo-40 cents ngenxa yentela kaphethroli (fuel levy) engu-52 cents.
Lezi zindaba zikhishwe yi-Automobile Association (AA) izolo. Ithe ukusimama kweRandi bekuzokwehlisa uphethroli ngo-13 cents kodwa abantu baseNingizimu Afrika ngeke bawuzwe umehluko ngenxa yentela kaphethroli ezoqala ukusebenza ngenyanga ezayo.
Esitatimendeni abe-AA bathe obenguNgqongqoshe wezeziMali, uMnuz Malusi Gigaba unyuse intela kaphethroli ngo-22 cents ilitha isuka ku-R3.15 yaba nguR3.37 okusho ukuthi inyuke ngo-7%.
Intela ekhokhelwa abasiza abalimele ezingozini zomgwaqo iRoad Accident Fund Levy inyuke ngo-30 cents isuka ku-R1.63 yaba wu-R1.93 okusho ukuthi inyuke ngo-18%.
Bathe njengamanje ilitha kaphethroli ibiza u-R13.54 ezifundazweni ezimaphakathi nezwe okusho ukuthi uma wehla ngo-12 cents abantu bebezokhokha u-R13.42 kodwa ngenxa yentela ka-54 cents bazokhokha u-R13.94.
UMnuz Layton Beard we-AA uthe ukunyuka kukaphethroli kuzoshaya abampofu ngoba osomatekisi nabamabhasi bazoyinyusa imali yokugibela bese bephinda besizwa yizindleko zentela yezimpahla.
UMnuz Tertius Troost, oyisazi sentela enkampanini iMazars, uthe intela izoshaya bonke abantu baseNingizimu Afrika. I-VAT izonyuka ngo-1% iye ku-15%.
“Ukunyuka kwe-VAT kunyusa yonke into ethinta impilo yethu kusukela kuphethroli, ukudla impahla yokugqoka nezinye izidingo zethu. Abampofu bazoshayeka kakhulu ngoba osomatekisi abanalo uzwelo bazoyinyusa imali yokugibeka ukuze bavike ukunyuka kukaphethroli,” kusho uTroost.
Kwabathanda ukwenza ama-braai nokuzijabulisa, uTroost uthe impilo ngeke isafana ngoba yonke into izomba eqolo ngenxa yentela.
“Uma umuntu ehola u-R923 u-R323 uzokhokhela intela. U-R182 uzoya kwintela yempahla nenye. Uma esefaka intela ekhokhwa uma uthenga inyama nekhokhwa uma uthenga izimpahla zokugqoka kusho ukuthi uzosala engenalutho,” kusho uTroost.
Uthe abantu kufanele babophe izifociya ngoba intela ngeke bayibalekele ikakhulukazi iVAT.
“Siyamuzwa uhulumeni ethi abampofu uyabavikela ekunyukeni kwentela kodwa akusilo iqiniso lokhu ngoba bayawagibela amatekisi futhi bayazikhokhela ezinye izinto ezine-VAT. Okusalayo sizokhokha sithanda singathandi,” kusho uTroost.