Kushile kwabenza inkohlakalo kwezempilo
INHLANGANO yabahlengikazi, iSouth African Nursing Council (SANC) seyethule ulayini wocingo wokubika izigameko zenkohlakalo ezithinta umkhakha wobuhlengikazi.
Lo layini ozosebenza ubusuku bonke kulindeleke ukuthi usize ekutheni abantu babike ngezigameko zenkohlakalo, ezabantu abenza izinto eziphambene nemigomo yobuhlengikazi nokunye.
Isikhulu seSANC, uNkk Sizeni Mchunu, sithe lo layini uzosiza abazobe befuna ukubika ubugebengu ngaphandle kokuthi baziveze.
Uthe le nhlangano ikuthathela phezulu ukusebenza ngendlela ehambisana nemigomo futhi ilindele iqiniso, ukuqinisekisa ukuthi izinto zibekwa obala nangokuhlonipheka.
“Ukusebenza ngendlela engahambisani nemigomo, nobugebengu akugcini kuphazamise inhlangano kuphela kodwa kuthinta abasebenzi, amalungu esigungu sethu, abenza izinhlelo ezahlukene nabanye esisebenzisana nabo,” kusho uNkk Mchunu.
Ezinye zezinto abantu abangabika ngazo yinkohlakalo, ukweba, ukungaphathwa ngendlela kwezimali, ubugebengu obuhambisana nokubhalwa kwezivivinyo nobugebengu obuthinta ukubhaliswa kwezikhungo. Le nhlangano isanda kuzibangela amazinyo abushelelezi kubafundi abafundela ubuhlengikazi emuva kokuthi kuputshuke amaphepha abebhalwa ngabafundela obuhlengikazi nyakenye. Ngaphandle kwalokho kunezigameko eziningi zabafundi ababhalisela ukufunda ubuhlengikazi ezikhungweni ezingombombayi bagcine belahlekelwe yimali.
Uthe ukuqinisekisa ukuthi abantu ababika izigameko zenkohlakalo bayaphepha, bathole inkampani yangaphandle ukuthi kube yiyo ebhekela izinhlelo zokungamela ulayini wabo wokubika inkohlakalo.
Abafisa ukubika ngobugebengu nenkohlakalo bangathinta u- 0800 20 12 16 noma bathumele i-email ku- fraud@kpmg. co.za.
UMnuz Sibongiseni Delihlazo, okhulumela inyunyana yabahlengikazi, iDemocratic Nursing Organisation of South Africa (Denosa) kuzwelonke uthe bayasithakasela isinyathelo esithathwe yiSANC.
Uthe bafisa isigungu sandise amahhovisi ukuze abahlengikazi bangahambi ibanga elide beya ehhovisi laso ePitoli.