Baphazanyiselwani beyosebenzela umphakathi?
KUTHANGI sibike ngodaba lokuhlukumezeka kwabasebenzi abaqashwe nguMnyango wezeMpilo emtholampilo waKwaMashu, iPoly. Laba basebenzi sebenqume ukungazihambeli iziguli ezihlinzekwa ngemishanguzo emakhaya, ezikoleni neziphazamiseke emqondweni ezilashelwa emakhaya ngoba bengaphephile.
Ngesonto eledlule kwadunwa imoto yalo mnyango ihamba omunye wabasebenzi ephuma emtholampilo omdala ethi uya komusha.
Kuthiwa kwenzeka lokhu nje bekusanda kudunwa enye imoto ihamba umsebenzi ohambela iziguli emakhaya, ophucwe imoto engena ePoly entsha ngenyanga edlule.
Abasebenzi bathi sekukaningi bekhuluma nabaphathi ngendaba yokuphepha kwabo. Nangonyaka odlule kukhona imoto eyathathwa ngale ndlela eLindelani yatholakala esigcemeni kwaJ KwaMashu.
Laba basebenzi asebeze bathatha lesi sinqumo esinzima, siyazwakala isizathu abasibekayo, akekho ongabasola ngesinqumo sabo.
Uhulumeni uyazama ngokwamandla anawo ukuhlinzeka wonke umuntu odinga usizo lwezempilo lwamahhala.
Uhlelo lokuhambela iziguli emakhaya nasezikoleni lumqoka ngoba okokuqala luqinisekisa ukuthi alenzeki iphutha iziguli zingayitholi imithi ngesikhathi, okungasho ukuthi aziyiphuzi ngendlela efanele.
Okwesibili, luphungulela imindeni yeziguli umthwalo nezindleko zokugibela uhambisa ogulayo emtholampilo. Kodwa manje sesiyayona thina manje le nto enhle kangaka ngenxa yobugebengu.
Izigebengu ezenza lokhu ziyaziwa emphakathini KwaMashu futhi zifukanyelwe yiwona. Ngumvuzoke lona wokufukamela izigebengu.
Yebo, uhulumeni kufanele aqiniseke ukuthi kuphephile lapho abasebenzi bakhe besebenzela khona. Kodwa nomphakathi kufanele ufake isandla.
Baphazanyiselwani abantu beyokwenza umsebenzi osiza umphakathi? Ake sifunde ukuzicabangela siwumphakathi, sihlukane nokwenza izinto ezisilimazayo futhi zisihlehlisele emuva ngoba sazi ukuthi uma sekonakele sizojaha ukusola uhulumeni ngayo yonke into.
Asizifundiseni nokuyihlonipha impahla yomphakathi singayicekeli phansi.