Asimnikeze ithuba umqeqeshi uKomphela Makhosi amahle
MHLELI: Ngingajabula kakhulu uma ezami Amakhosi zingase ziwine isicoco esisodwa kulezi ezisele.
Ngithandazela umqeqeshi wethu engimthandayo futhi ngiyameseka njengomqeqeshi wethu esinaye okwamanje. Kuyisifiso sami ukuthi baphinde bamnike ithuba okungenani isizini eyodwa ngoba yindoda ebekezelayo futhi angingabazi ukuthi ukube wumlungu ngabe kade wawuyeka lo msebenzi. Angiqondile ukucwasa ngokwebala kodwa umqeqeshi weChiefs ziningi izingqinamba abhekana nazo esingazazi ngoba thina sibabona sebedlala ensimini.
Ngibonga inhlonipho asinika yona singabalandeli ngoba ukuhambisa phambili ukujabula kwethu. Akakhulumi noma kanjani kithi ngisho singasho yonke inhlamba kuye futhi akajwayele ukukhala uma engawinanga kodwa uyamukela noma kubuhlungu kithina.
Asimeseke ngoba akekho omunye umqeqeshi wethu esinaye okwamanje ngaphandle kwakhe. Ngisacela balandeli baMakhosi amahle ukuthi ningalilahli ithemba ngomqeqeshi wethu wengabade. Sisazojabula kubuye injabulo yakudala. IChiefs ithakwe nangabafana abancane esingabala abanjengoMeyiwa, Moon, Ngezane noNtshangase futhi banekusasa eliqhakazile.
Umbono wami uthi asimnike ithuba aqhubeke nakuzamayo ngoba nomqeqeshi omusha uzothi esakhanda siphinde silinde isizini singawini lutho. Umfo kaKomphela uzobe engasenasizathu ngoba silindele akhiqize asekukhandile eNeturena. Ngiyabonga kakhulu ukuthi ngithole ithuba lokuveza engikufisayo ngeqembu lethu iChiefs. Scathulo Thusi MTUBATUBA