Ukhala ngokubizwa kukaRulani kwiBafana
UMQEQESHI we-Orlando Pirates uMilutin “Micho” Sredojevic uvule isifuba okokuqala ngokubizelwa eqenjini lesizwe laseNingizimu Afrika kukaRulani Mokwena oyiphini lakhe.
UMokwena ushiye iMamelodi Sundowns wajoyina iPirates ekuqaleni kwesizini.
Selokhu efikile kwiPirates wonke umuntu ubabaza ubuchule bakhe. UBaxter umfake ethimbeni lakhe labaqeqeshi ngesikhathi ememezela iqembu elizodlala kwiFour Nations eZambia ngesonto elizayo.
I-Four Nations ibophele iBafana Bafana, Angola, Zimbabwe neZambia engosokhaya. UMicho utshele abezindaba, ngemuva kokudliwa yiCape Town City ngo 1-0 kwi-Last 16 yeNedbank Cup eCape Town Stadium, eKapa, ukuthi umqondo-mbili ngokubalwa kukaMokwena kwelesizwe. “Ngizonibeka esithombeni nje ngenkulu inhlonipho. Ukubizwa kukaRulani kufike ngesikhathi esibi kithina. Njengamanje sisesigabeni sesizini lapho sidinga ukugxila sijule emidlalweni esele. Noma kunjalo ke kodwa ngeneme ngokuthi ufakiwe kwelesizwe. Angingabazi ukuthi uzofike enze umehluko. Naye kuzomkhulisa ukuba yingxenye yeqembu lesizwe kulezi zinsuku ezincane,” kusho uSredojevic. I-Bucs ihlezi endaweni yesibili kwi-log ye-Absa Premiership ngamaphuzu angu-29 emidlalweni engu-23. Isele ngamaphuzu amane kwiMamelodi Sundowns eqhwakele.
Isicoco seligi sekuyilona themba lokugcina lePirates lokunqoba isicoco kule sizini.
Leli qembu seliphuthwe yiMTN 8, Telkom Knockout neNedbank Cup. UBaxter ufake nabadlali ababili bePirates kwiBafana, uThembinkosi Lorch no-Innocent Maela.
“Ngijabule ngabadlali bethu abafakwe esikwatini seBafana. Ngibafisela inhlanhla. Imidlalo yesihle imqoka kakhulu kwiBafana ngoba izobhekana nohla lwemidlalo enzima yokuzibekisela indawo kwi-Africa Cup of Nations ngoSepthemba kuya kuNovemba,” kusho uSredojevic.
Umqeqeshi weCape Town City, uBenni McCarthy, usihlabile isinqumo seSafa sokubiza uMokwena.
“Ngicabanga ukuthi kuzoba nzima kwiPirates. I-Pirates ayizwani nokubhangqa. Ayiyekwe iPirates ukuze izoshubisa umbango wesicoco seligi. Iligi yethu kumele ishube futhi ihehe. Ngifuna kuyiwe osukwini lokugcina lokusongwa kwesizini sinethemba lokuthi uma iSundowns noma iPirates ishibilika sisengakwazi ukuwina Iligi. Mhlawumbe sebengamthatha ke uRhulani uma sekuphele isizini,” kusho uMcCarthy.
UMokwena usebenze kakhulu emaqenjini enkulisa eSundowns ngaphambi kokunyuselwa eqenjini elikhulu.
“URulani mncane, unekhono eliyisimanga futhi uyingcithabuchopho yomqeqeshi. URulani wehlukile, ngiyayithanda indlela ayiyona. Akayena umuntu omemezayo noma onolaka. Kwesinye isikhathi abadlali bafuna umuntu onjalo. Abadlali abamfuni umqeqeshi ozithwele owenza sengathi wazi yonke into ngebhola ikakhulukazi uma ungadlalanga ezingeni elikhokhelayo. Uzokwenza omkhulu umehluko kwiBafana,” kuqhuba uMcCarthy.