‘Angifuni ukuzifakela ingcindezi’
UMGADLI weKaizer Chiefs, uRyan Moon, akafuni ukuzifakela ingcindezi yokuthwala leli qembu elibhekene nesomiso sezindebe.
UMoon ubuyise inhlansi yethemba yokuwina indebe kubalandeli beChiefs, emuva kwamasizini amabili agcwele, ngokushaya amagoli imidlalo ilandelana. Nakuba leli qembu lishaya ngabagadli abanamava okukhona kubona uBernard Parker noGustavo Paez kodwa lizithola selithembele kuMoon oseyikluma kwi-Absa Premiership.
Ubukeka usushabalele umfutho ekhempini yeChiefs emuva kwamasonto abadlali bezibona benethuba lokuvala igebe lamaphuzu eliphakathi kwabo neMamelodi Sundowns ezihola phambili kwi-log yePremiership. Ukuhluleka ukuthola amaphuzu amathathu kweChiefs ngesikhathi ibhekene neBloemfontein Celtic nokwehlulwa yi-Orlando Pirates kubukeka kuzwele kakhulu kubadlali.
UMoon uthe nakuba sekuqala ukuzwela ukuthi usedlale imidlalo emithathu engalishayi igoli kodwa akafuni ukuzifaka ingcindezi yokuthwala iChiefs.
“Angizifaki ingcindezi. Ngicabanga ukuthi uma uqala uzifaka ingcindezi uyaqala ukungadlali ngendlela oyijwayele. Ngiyakwazi engikulindele, ngiyakwazi engikwazi ukukwenza. Okwami wukuthatha igxathu ngalinye ngesikhathi, ngenze lokhu engikwenza kangcono,” kusho uMoon.
“Akungikhathazi ukuthi emidlalweni yakamuva angikwazanga ukushaya amagoli. Ngiyafuna ukushaya amanye amagoli kodwa ngizothatha igxathu ngalinye, amagoli azozizela.”
IChiefs izobhekana naMaZulu emdlalweni wePremiership eFNB Stadium, eNasrec, kusasa ngo-6 ntambama. USuthu lusanda kukhishwa kwiNedbank Cup Ubuntu Cape Town egijima kwiNational First Division ( NFD). Akubuzwa ukuthi luzongena eFNB lugqugquzelekile ukuphuma namaphuzu amathathu. AmaZulu asendaweni ka-13 ngamaphuzu angu-27 emuva kwemidlalo engu-23.
UMoon, ongomunye wabadlali abasebancane ababizelwe kwiBafana Bafana ngumqeqeshi uStuart Baxter, uthe abakalilahli ithemba ngeligi.
“AmaZulu ahlala eyiqembu elinzima ikakhulukazi uma ebhekene namakhulu, ayazimisela. Siwubheke ngabomvu lowo mdlalo, amaphuzu amathathu abalulekile kithina ikakhulukazi njengoba kade sihlulwe yiPirates,” kusho uMoon.
“Sifuna ukugijima owethu umjaho. Sifuna ukuqoqa amaphuzu amathathu ngesikhathi. Kusele imidlalo eyisikhombisa nokusho ukuthi kunamaphuzu amathathu emdlalweni ngamunye. Akufanele sizihluphe ngokuthi kwenzekani phezulu naphansi. Kufanele sigxile kithina, sithole amaphuzu amathathu ngesikhathi. Ithemba lisekhona (lokuwina iligi). Uyazi ebholeni kwenzeka noma yini.Okwethu
Lwukuqhubeka nokusebenza kanzima.”