Izimoto ezeyamaniswa nabathile
NGIYAKHULEKA kinina bathandi bale nto yokushaya ama-hazard. Kulezi zinsuku ngisanda kubona ukwethulwa kweVW Polo entsha kwaqedwa ngendala. Kudlule amasonto amabili kwethulwa iPolo Vivo entsha noma angithi endala ngomzimba esikhundleni salena ejwayelekile.
Sekungenzeka udideke uma ucabanga ukuthi wazi umehluko phakathi kweVivo nePolo ewungqo kodwa uzojwayela. Uma ukhumbula kahle uzongivumela uma ngithi iVivo yethulwe ngesikhathi abakwa VW beqeda ngeGolf 1 ebisidonse kusukela ngeminyaka ka-1970 yaze kweka-2000. I Golf 1 yaba yiCTI, CITI, Life, Chicco, Rox, Velocity njalo-njalo. Nokho angiqondile ukugxila emlandweni wale moto ebidume ngokuba eyabafana abancane, wukuthi nje ngenza isibonelo esiyisendlalelo sengxoxo yethu namuhla.
Abashayeli bamaGolf bazongivumela ukuthi bayabuthwala ubunzima emehlweni omphakathi nawomthetho. Laba bashayeli basosizini olulodwa nabashayeli bamaPolo nama VR6. Kunjalo nje nabama BMW E30 (Gusheshe) nama BMW E36 (Dolphin) babizwa ngamasela bonke. Ngingasayiphathi-ke uma ike yatonwa noma yaba nenjini ethe xaxa njengo 323i nama IS kuya phezulu. Kuze kuthiwe yimoto yamasela.
Abama Toyota Hilux (hips noma ingulube) ngisho nama VVTi kuvele kuthiwe yimoto yosomatekisi. Angiphathi-ke uma ithe ukuhlotshiswa yagqoka i-wheel cap eyafika neToyota Hi-Ace GLX yangasekupheleni kweminyaka ka-1980 lawa abizwa ngo ’87 ivele igcwale incwadi. Uma ungake uhambe ngeToyota Cressida (ikhona) kuvele kuthiwe yimoto yezinkabi, ikakhulukazi uma kuzoba yiGLi6, 2.8 noma 3.0 litre.
Uma uqhamuka ngo Chev 4.1 noma uCommodore kuthiwa wubhuti osebenza eGoli noma ngabe lithini ipuleti. Ake ngikulethe kwezamanje izimoto. Uma ubonakala uhamba ngengqovungqovu ye Ford Ranger noma iRange Rover Sport esezingeni elicokeme kuvele kuthiwe unamathenda.
Ngokunjalo namaGolf 6 no 7 ikakhulukazi lawa angomagaba ngejubane njengeGTI noR (vruu-phah) kuye kuthiwe wubhuti wamathenda. Nawo amathenda ayashiyana ngamazinga. Uma ungake uqhamuke ngeMasserati, Lamborghini, Ferrari, Mercedes G Class bese iba yi AMG noma BMW 4 Series noma M Sport nezinye, kuvele kuthiwe amathenda omgunyathi.
Uma ubonakala ungowesifazane uhamba ngalezi zimoto kuvele kuthiwe yimoto obusiswe ngayo yiBlessa lakho noma akuyona eyakho eyendoda thizeni enemali, ngoba akuvumi abantu bakwamukele ukuthi ingane yabantu isebenza kanzima. Zikhona futhi izimoto ezeyamaniswa nosizi. Uma uqhamuka nge-Opel Corsa kuthiwa yimoto yongoqo, uma kuzoba yiCorsa Lite kuthiwe wayithengelwa ngabazali ukuze uye ngayo esikoleni.
Uma ungumfana uqhamuka ngeKia Picanto noma ngeFord Figo kumbe iDodge Caliber kuye kuthiwe yimoto yentombi noma kamama wakho. Kukhona owangitshela ukuthi amaLexus IS250 abizwa ngokuthi yizimoto zamaChartered Accountants. Ziningi ezinye izimoto esingazibalanga lana ezeyamaniswa nohlobo oluthile lwabantu. Kukhona ngisho okuthiwa wumzamo kathisha, ezinye zeyamaniswa nesimilo somnikazi. Singama hazard sike saxoxa nabakhiqizi nabadayisi bezimoto ezithile. Phakathi kwabo sakhuluma noMnuz Mongezi Tembe ophethe igatsha lakwaBMW SMG eThekwini kuSomtsewu Road.
Uthe ayikho imoto eyakhelwa ubulili obuthize noma isimilo esithize kodwa kuyenzeka zakhelwe impilo yomuntu nomuntu hhayi ngokubheka ubugebengu noma ukuziphatha kahle kwakhe kodwa ngokubheka ukuthi unomndeni noma uyimpohlo.
Babheka ukuthi uhola kangakanani, ukuthi izindawo ozihambayo zingaba njani nokuthi udinga imoto enkulu noma encane. Kuyenzeka uthole umuntu ongahlanganise lutho nobugebengu ahambe ngemoto okuthiwa ngeyezigebengu. Kuyenzeka uthole umuntu ongahlanganise lutho namatekisi kodwa ehamba ngemoto ebukwa njengeyosomatekisi.
Ngakho singabajaji ngezimoto abantu ngoba kungenzeka sishaye phansi kushunqe uthuli. Mina ngiyazithandela izimoto zakudala ezinamandla ezidonsa ngezihlekehleke zezinjini o V6 no V8 ikakhulukazi ezakwa Chev, Ford, Jaguar nezinye. Uma uyibona ngiyipakile ungalinge ucabange ngeyekhehla lomlungu ngoba ubona ukuthi yinsobonsobo yeminyaka ka-1960, uzodidiseka. Ukuhamba ngemoto kusuka othandweni hhayi kangako esimilweni somshayeli.
Ungalinge udidiseke ngosisi abahamba ngama KIA Rio namaRenault Cleo ucabange ukuthi bathanda uphuzo oludakayo namanjeza abantu ngoba baningi esibaziyo abangenandaba nezinkamba noma amanjeza abantu.
Nabomthetho abangaphumi iqhuzu namaPolo ngoba bethi ahamba amasela ekhadi nawezimoto kanti akuhlele kunjalo. Kunehlaya elenziwa ngabantu lokuthi uma ufica ingozi yomgwaqo kukhona iPolo, ngowePolo osephutheni, noma ufika kungekho Polo engozini yazi ukuthi baphazanyiswe yiPolo ehambile yangama kwasala kwenzeka ingozi, yiphutha lelo esilibhebhethekisayo.
Hhayi-ke ngiyethemba ukuthi onamehlo ufundile wezwa, ngakho-ke sesingawavala lapha okwamanje ama hazard ethu sibuyele emgwaqweni sipheze ukwahlulela abantu. Asishayele ngokuphepha nokubuswa yimithetho yezomgwaqo yakuleli noma ngabe imoto ivuma noma ingavumi ukuze sihlangane siphilile nangesonto elizayo kuyo le nkundla.
Uma ufisa ukuthi sixoxe yenza njengoba benza abanye, ngena kwiFacebook ethi Igedlela lami with Sthembiso Shangase sixoxe noma yingani ethinta izimoto. Yimi owenu nali ikheli ngezansi hazardiso@gmail.com