Kubatshazwa ubunzima obuza nentela iVAT
IZAZI zomnotho zidonse ngendlebe abantu ukuthi babophe izifociya ngoba kuzoshuba njengoba sekuzozwakala ukunyuka kwentengo ekhokhwa uma uthenga impahla, iValue Added Tax (VAT) enyuke ngo-1% isuka ku-14% yaya ku-15%.
UMnuz Jason Urbach oyisazi somnotho kwiFree Market Foundation, uthe ukunyuka kweVAT kuzoshubisa ngoba kuzozwela kuwo wonke umuntu.
“Abantu kufanele babophe izifociya ngoba intela izobaphilisa kabuhlungu. Abampofu bazoyikhokha iVAT ngoba akudliwa impuphu kuphela kodwa bayayidla inyama nokunye okuningi. Bazokhokha kakhulu noma begibela ngoba ukunyuka kwentela kaphethroli kusho ukuthi osomatekisi bazonyusa imali yokugibela, ukuze benze inzuzo,” kusho u-Urbach.
UNobhala weCosatu KwaZuluNatal uMnuz Edwin Mkhize, uthe namhlanje bazoqhinqa ngaphandle kwamahhovisi oMnyango wezeziMali eMgungundlovu, emgwaqweni uChief Albert Luthuli ngoba bafuna yehliswe iVAT.
“Silindele ukuthi uhulumeni wethu njengoba ehlale ethi uyabalalela abantu, asilalele ayehlise iVAT ngoba ihlukumeza wonke umuntu. Yebo kukhona ukudla okuthiwa uma ukuthenga ngeke uyikhokhe iVAT kodwa lokhu akuwususi umthwalo emahlombe abantu. Sifuna uhulumeni ayehlise iVAT,” kusho uMkhize.
Uthe banethemba lokuthi uhulumeni uzoyehlisa iVAT ngoba umkhankaso wabo wokuthi yehle uyaqhubeka.
UMengameli weCosatu, uMnuz Sdumo Dlamini uthe baxoxe nobuholi be-ANC ngodaba lweVAT kodwa bebengakaxoxi noMnyango wezeziMali. Uthe sebeqalile ukumasha ngoba bafuna ukuthumela umyalezo ocacile wokuthi abahambisani nokunyuka kweVAT. Khona manjalo inkampani ekhiqiza ukudla iWillowton Group, iveze ukuthi ngeke iyinyuse iVAT ngo-Ephreli, Meyi nangoJuni ukuze ivikele abathengi.
Isikhulu esiphezulu seWillowton Group, uMnuz Zubeir Moosa sithe bayazi ukuthi iVAT izoshubisela abathengi yingakho bekhethe ukungayinyusi kuyo yonke imikhiqizo yabo okungenani izinyanga ezintathu.
“Sicela nezinye izinkampani zingayinyusi iVAT izinyanga ezimbalwa, ukuze abathengi bangathwali kanzima,” kunxusa uMoosa.